മലപ്പുറം പ്രീമിയര്‍ ലീഗ് ക്രിക്കറ്റ് നാലാം സീസണ്‍

ദമാം | ക്രിക്കറ്റിനെയും ചാരിറ്റിയെയും സമന്വയിപ്പിച്ചു കൊണ്ട് ദമാം മലപ്പുറം ക്രിക്കറ്റ് കൂട്ടായ്മ സംഘടിപ്പിക്കുന്ന മലപ്പുറം പ്രീമിയര്‍ ലീഗ് എം പി എല്‍ സീസണ്‍ 4 ഉം, സഊദി അറേബ്യയില്‍ ആദ്യമായി നാല് രാജ്യങ്ങള്‍ പരസ്പരം മാറ്റുരക്കുന്ന ഏഷ്യാ കപ്പ് സീസണ്‍ ഒന്നാം മത്സരങ്ങളും മാര്‍ച്ച് 9, 10 തിയ്യതികളില്‍ അല്‍ഖോബാര്‍ ഇ ആര്‍ സി എ സ്റ്റേഡിയത്തില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.

ദമാം റോയല്‍ മലബാര്‍ റെസ്റ്റോറന്റില്‍ വച്ച് നടന്ന ജേഴ്സി-ട്രോഫി പ്രകാശനം സഊദി കേരള സമാജം പ്രസിഡന്റ് ആല്‍ബിന്‍ ജോസഫ് ഉദ്ഘാടനം ചെയ്തു. മലപ്പുറം കൂട്ടായ്മ പ്രസിഡന്റ് ഷഫീഖ് കട്ടുപ്പാറ അധ്യക്ഷത വഹിച്ചു. ചടങ്ങില്‍ കിഴക്കന്‍ പ്രവിശ്യയിലെ കായിക മേഖലകളിലെ പ്രമുഖര്‍ സംബന്ധിച്ചു.

സീസണ്‍ ഫോറില്‍ അല്‍ജസീറ പൊന്നാനി, അവഞ്ചേഴ്സ് പെരിന്തല്‍മണ്ണ, റോമ കാസ്റ്റില്‍ കൊണ്ടോട്ടി, നോണ്‍ ടോക്‌സിക് മലപ്പുറം, ശാസ് ക്ലബ് വെട്ടത്തൂര്‍, ഗ്ലോബ് വിന്‍ തീരൂര്‍കാട് എന്നീ ടീമുകളും, ഏഷ്യാ കപ്പ് സീസണ്‍ ഒന്നില്‍ ടീം ഇന്ത്യ, പാക്കിസ്ഥാന്‍, ശ്രീലങ്ക, സഊദി അറേബ്യ ടീമുകള്‍ ഏഷ്യ കപ്പിനായും മാറ്റുരക്കും.

പ്രസിഡന്റ് ഷഫീഖ് കട്ടുപ്പാറ, ശിഹാബ് വെട്ടത്തൂര്‍, സാബിത്ത് ചിറക്കല്‍, യൂനുസ് വളാഞ്ചേരി, റാഷിദ് വളാഞ്ചേരി വാര്‍ത്താ സമ്മേളനത്തില്‍ പങ്കെടുത്തു.