മാഞ്ചസ്റ്റർ സിറ്റിയും പിഎസ്‌ജിയും കടന്നു; ചാമ്പ്യൻസ് ലീഗിൽ ഇനി പ്ലേ ഓഫ്‌ പോരാട്ടം

ലണ്ടൻ | യുവേഫ ചാമ്പ്യൻസ് ലീഗിൽ മാഞ്ചസ്റ്റർ സിറ്റിയും പിഎസ്‌ജിയും പ്ലേ ഓഫിൽ കടന്നു. വാശിയേറിയ അവസാന ഗ്രൂപ്പ് റൗണ്ട് മത്സരത്തിൽ ജയത്തോടെയാണ്‌ ഇരുടീമും പ്ലേ ഓഫ് ഉറപ്പിച്ചത്‌. ബെൽജിയം ടീം ക്ലബ് ബ്രൂഗിനെ ഒന്നിനെതിരെ മൂന്ന്‌ ഗോളുകൾക്ക്‌ തോൽപ്പിച്ചാണ്‌ സിറ്റിയുടെ വിജയം. ഒരു ഗോളിന്‌ പിന്നിട്ടുനിന്ന സിറ്റി പകുതി സമയത്തിന്‌ ശേഷമാണ്‌ മൂന്ന്‌ ഗോളും നേടിയത്‌.

സ്റ്റുഗാർട്ടിനെ തോൽപ്പിച്ചാണ്‌ പിഎസ്‌ജി പ്ലേ ഓഫ്‌ ഉറപ്പിച്ചത്‌. ഒന്നിനെതിരെ നാല്‌ ഗോളിനാണ്‌ പിഎസ്‌ജിയുടെ വിജയം. അതേസമയം ഒന്നാം സ്ഥാനത്തുണ്ടായിരുന്ന ലിവർപൂൾ പിഎസ്‌വിയോട്‌ തോറ്റു (3‐2). എങ്കിലും ഒന്നാംസ്ഥാനം നഷ്‌ടപ്പെട്ടില്ല. രണ്ടാംസ്ഥാനത്തുള്ള ബാഴ്‌സലോണ അറ്റ്‌ലാന്‍റയോട്‌ സമനില വഴങ്ങി (2‐2).

ലീഗിന്‍റെ പുതിയ പതിപ്പിൽ എട്ടു കളികളാണ്‌ ആദ്യം. 36 ടീമുകളിൽ ആദ്യ എട്ടു സ്ഥാനക്കാർ നേരിട്ട് നോക്കൗട്ടിലേക്ക് യോഗ്യത നേടി. ഒമ്പതു മുതൽ 24 വരെ സ്ഥാനങ്ങളിൽ എത്തുന്ന ടീമുകൾ പ്ലേ ഓഫ് കളിക്കും. പ്ലേ ഓഫിൽ ജയിക്കുന്നവർ നോക്കൗട്ടിലേക്ക് കടക്കും. ബാക്കിയുള്ള ടീമുകൾ പുറത്തുപോകും.

നോക്കൗട്ടിലേക്ക്‌ കടന്ന ടീമുകൾ – ലിവർപൂൾ, ബാഴ്സലോണ, ആഴ്‌സണൽ, ഇന്‍റർ മിലാൻ, അത്ലറ്റികോ മഡ്രിഡ്, ബയർ ലെവർകുസൻ, ലില്ലെ, ആസ്റ്റൺ വില്ല.പ്ലേ ഓഫിലേക്ക്‌ കടന്ന ടീമുകൾ- അറ്റ്ലാ‌ന്‍റ, ബൊറൂസിയ ഡോർട്ട്മുണ്ട്, റയൽ മഡ്രിഡ്, ബയേൺ മ്യൂണിക്ക്, എസി മിലാൻ, പിഎസ്‌വി, പിഎസ്‌ജി, മൊണാക്കോ, ബെൻഫിക, ഫെയെനൂർദ്, ബ്രെസ്റ്റ്, യുവന്‍റസ്, സെൽറ്റിക്, മാഞ്ചസ്റ്റർ സിറ്റി, സ്‌പോർട്ടിങ്‌, ക്ലബ് ബ്രൂഗ്.

പുറത്തായ ടീമുകൾ – സ്റ്റുഗാർട്ട്, ഡൈനാമോ സാഗ്രെബ്, ഷാക്താർ ഡൊണെട്സ്ക്, ബൊലോഗ്ന, സ്പാർട്ട പ്രാഗ്യു, ലെയ്പിഷിസ്, ജിറോണ, റെഡ് സ്റ്റാർ ബെൽഗ്രേഡ്, സ്റ്റാം ഗ്രാസ്, സാൾസ്ബർഗ്, സ്ലോവൻ ബ്രാറ്റിസ്ലാവ, യങ് ബോയ്‌സ്‌.