ഗ്രാമീണ വികസനം ലക്ഷ്യമിട്ട് ദേശീയ പദ്ധതികളുമായി മർകസ്

കോഴിക്കോട്| ദേശീയ തലത്തില്‍ പ്രത്യേക പ്രാധാന്യം നല്‍കി വിദ്യാഭ്യാസ-സാമൂഹ്യക്ഷേമ പദ്ധതികള്‍ വ്യാപകമാക്കാന്‍ മര്‍കസു സഖാഫത്തി സുന്നിയ്യ. 2025-28 വര്‍ഷത്തെ മര്‍കസ് ജനറല്‍ ബോഡിയുടേതാണ് തീരുമാനം. പ്രവര്‍ത്തന സൗകര്യത്തിന് രാജ്യത്തെ 16 റീജിയനുകളായി ക്രമീകരിച്ചാണ് പദ്ധതികള്‍ ഏകോപിപ്പിക്കുക.

വിദ്യാഭ്യാസത്തിലൂടെയും അടിസ്ഥാന സൗകര്യങ്ങളുടെയും നവീകരണത്തിലൂടെ മാത്രമേ ഗ്രാമീണ ജനതയുടെ ഉന്നമനം സാധ്യമാവൂ എന്ന കഴിഞ്ഞ ഏതാനും വര്‍ഷങ്ങളുടെ പ്രവര്‍ത്തന അനുഭവത്തില്‍ നിന്നാണ് വിപുലീകരണ പദ്ധതികള്‍ക്ക് തുടക്കമിടുന്നത്. സമസ്ത നൂറാം വാര്‍ഷിക കര്‍മ പദ്ധതികളുടെ സാക്ഷാത്കാരമായാണ് പ്രവര്‍ത്തനങ്ങള്‍ ലക്ഷ്യമിടുന്നത്.

പശ്ചിമ ബംഗാള്‍, ഗുജറാത്ത്, കര്‍ണാടക റീജിയനുകളില്‍ നിലവിലുള്ള ക്യാമ്പസുകള്‍ ഇന്റഗ്രേറ്റഡ് നോളേജ് ഹബ്ബാക്കി മാറ്റുക, മര്‍കസ് പബ്ലിക് സ്‌കൂളുകള്‍, സീക്യൂ നെറ്റ്വര്‍ക്കുകള്‍ ദേശിയ തലത്തില്‍ വ്യാപിപ്പിക്കുക, ചെറുപട്ടണങ്ങളും ഗ്രാമങ്ങളും കേന്ദ്രീകരിച്ച് ലോ കോളേജുകളും നിയമ സഹായ വേദികളും സ്ഥാപിക്കുക, മെഡിക്കല്‍ മിഷന്റെ ഭാഗമായി ഹോസ്പിറ്റലുകളും പഠന കേന്ദ്രങ്ങളും നിര്‍മിക്കുക തുടങ്ങിയവയാണ് പ്രധാന പദ്ധതികള്‍.

കൂടാതെ കേരളത്തിലെ മര്‍കസ് സ്ഥാപനങ്ങളില്‍ ഇതര സംസ്ഥാനക്കാര്‍ക്ക് കൂടുതല്‍ പ്രവേശനം നല്‍കുന്നതിനുള്ള നടപടി ക്രമങ്ങളും ആവിഷ്‌കരിച്ചിട്ടുണ്ട്. സമസ്ത കേരള ജംഇയ്യത്തുല്‍ ഉലമ പ്രഖ്യാപിച്ച സ്വകാര്യ യൂണിവേഴ്സിറ്റിയുടെ സാക്ഷാത്കാരത്തിനും മര്‍കസ് അന്‍പതാം വാര്‍ഷികത്തിനുമുള്ള പ്രാഥമിക പ്രവര്‍ത്തനങ്ങളും യോഗത്തില്‍ ചര്‍ച്ച ചെയ്തു. ജാമിഅ മര്‍കസ്, സമന്വയ സ്ഥാപനങ്ങള്‍ എന്നിവ കേന്ദ്രീകരിച്ച് സ്‌കില്‍ ഡവലപ്‌മെന്റ് സെന്ററുകള്‍ സ്ഥാപിക്കാനും സംരംഭകത്വ പരിശീലനം ശക്തിപ്പെടുത്താനും യോഗം തീരുമാനിച്ചു.

ജനറല്‍ ബോഡി സയ്യിദ് ഇബ്‌റാഹീമുല്‍ ഖലീല്‍ അല്‍ ബുഖാരി ഉദ്ഘാടനം ചെയ്തു. സയ്യിദ് അലി ബാഫഖി തങ്ങള്‍ പ്രാര്‍ഥന നിര്‍വഹിച്ചു. കാന്തപുരം എ പി അബൂബക്കര്‍ മുസ്ലിയാര്‍ മുഖ്യ പ്രഭാഷണം നടത്തി. സയ്യിദ് അബ്ദുല്‍ ഫത്താഹ് അഹ്ദല്‍ അവേലം, സി മുഹമ്മദ് ഫൈസി, വി പി എം ഫൈസി വില്യാപ്പള്ളി, അബൂ ഹനീഫല്‍ ഫൈസി തെന്നല, ത്വാഹ മുസ്ലിയാര്‍ കായംകുളം, പി വി മൊയ്തീന്‍ കുട്ടി മുസ്ലിയാര്‍ താഴപ്ര, എപി അബ്ദുല്‍ കരീം ഹാജി, ഡോ. മുഹമ്മദ് അബ്ദുല്‍ ഹകീം അസ്ഹരി, റഹ്മതുല്ലാഹ് സഖാഫി എളമരം, സയ്യിദ് മുഹമ്മദ് തുറാബ് സഖാഫി, അബ്ദുല്‍ മജീദ് കക്കാട്, എന്‍ അലി അബ്ദുല്ല, പ്രൊഫ. എ കെ അബ്ദുല്‍ ഹമീദ്, സി പി സൈതലവി മാസ്റ്റര്‍, എ സൈഫുദ്ദീന്‍ ഹാജി, സയ്യിദ് ശറഫുദ്ദീന്‍ ജമലുല്ലൈലി, സി പി ഉബൈദുല്ല സഖാഫി, സയ്യിദ് ശിഹാബുദ്ദീന്‍ അഹ്ദല്‍ മുത്തനൂര്‍, സയ്യിദ് സ്വാലിഹ് ശിഹാബ് കുറ്റിച്ചിറ, കല്‍ത്തറ അബ്ദുല്‍ ഖാദിര്‍ മദനി, കൂറ്റമ്പാറ അബ്ദുറഹ്മാന്‍ ദാരിമി, പി കെ എം സഖാഫി ഇരിങ്ങല്ലൂര്‍, പിസി ഇബ്റാഹീം മാസ്റ്റര്‍, പി മുഹമ്മദ് യൂസുഫ്, ഡോ. അബ്ദുസ്സലാം, സയ്യിദ് ഫസല്‍ തങ്ങള്‍ വാടാനപ്പള്ളി, മന്‍സൂര്‍ ഹാജി ചെന്നൈ, സിദ്ദീഖ് സഖാഫി ഒറ്റപ്പാലം, വി എച്ച് അലി ദാരിമി എറണാകുളം, ബിഎസ് അബ്ദുല്ലക്കുഞ്ഞി ഫൈസി, ടികെ അബ്ദുറഹ്മാന്‍ ബാഖവി മടവൂര്‍, ഊരകം അബ്ദുറഹ്മാന്‍ സഖാഫി, ഉസ്മാന്‍ മുസ്ലിയാര്‍ വയനാട്, പി കെ അലികുഞ്ഞി ദാരിമി, കെ എസ് മുഹമ്മദ് സഖാഫി,അബ്ദുല്‍ ജബ്ബാര്‍ സഖാഫി പെഴക്കാപ്പിള്ളി, സുലൈമാന്‍ കരുവള്ളൂര്‍, അബ്ദുല്‍ മുത്വലിബ് സഖാഫി, പുന്നോറത്ത് അമ്മദ് ഹാജി തുടങ്ങിയവര്‍ സംബന്ധിച്ചു.