മര്‍കസ് ഖുര്‍ആന്‍ ഫെസ്റ്റ് മത്സരങ്ങള്‍ക്ക് വെള്ളിയാഴ്ച തുടക്കം

കോഴിക്കോട് | വിശുദ്ധ ഖുര്‍ആന്‍ പ്രമേയമായി നടക്കുന്ന കേരളത്തിലെ ഏറ്റവും വലിയ വൈജ്ഞാനിക മത്സരമായ മര്‍കസ് ഖുര്‍ആന്‍ ഫെസ്റ്റ് (എം ക്യു എഫ്) ഈമാസം എട്ടിന് (വെള്ളി) ആരംഭിക്കും. മര്‍കസ് അക്കാദമി ഓഫ് ഖുര്‍ആന്‍ സ്റ്റഡീസിന്റെ ആഭിമുഖ്യത്തില്‍ സംഘടിപ്പിക്കുന്ന ഫെസ്റ്റിന്റെ രണ്ടാം എഡിഷനിലെ സെന്‍ട്രല്‍ മത്സരങ്ങള്‍ക്കാണ് കാരന്തൂരിലെ മര്‍കസ് കേന്ദ്ര ക്യാമ്പസില്‍ വെള്ളിയാഴ്ച തുടക്കമാവുക.

മൂന്നുദിവസം നീണ്ടുനില്‍ക്കുന്ന ഫെസ്റ്റില്‍ കേരളത്തിലെ വിവിധ ജില്ലകളിലെ 29 ക്യാമ്പസുകളിലെ 800 വിദ്യാര്‍ഥികള്‍ മാറ്റുരയ്ക്കും. ഖുര്‍ആന്‍ പ്രമേയമായ 28 വ്യത്യസ്ത മത്സരങ്ങളാണ് ഫെസ്റ്റിന്റെ മുഖ്യ ആകര്‍ഷണം. ഖുര്‍ആന്‍ പാരായണത്തിലും മനഃപാഠത്തിലും പരിശീലിപ്പിക്കുകയും അന്താരാഷ്ട്ര ഹോളി ഖുര്‍ആന്‍ അവാര്‍ഡ് മത്സരങ്ങളിലേക്ക് വിദ്യാര്‍ഥികളെ പ്രാപ്തരാക്കുകയും ചെയ്യുകയെന്നതാണ് ഫെസ്റ്റിന്റെ ലക്ഷ്യം. വിശുദ്ധ ഖുര്‍ആന്റെ മാനവിക സന്ദേശം, ബഹുസ്വരത, ശാസ്ത്രീയ വീക്ഷണം എന്നിവ വിളംബരം ചെയ്യുന്ന വിവിധ സെഷനുകളും ഫെസ്റ്റില്‍ നടക്കും.

നാല് സെക്ടറുകളിലായി ഒരുമാസത്തോളം നീണ്ടുനിന്ന സെക്ടര്‍ തല മത്സരങ്ങളില്‍ മികവ് പുലര്‍ത്തിയ വിദ്യാര്‍ഥികളാണ് സെന്‍ട്രല്‍ ഫെസ്റ്റില്‍ മത്സരിക്കുക. ഖുര്‍ആനിന്റെ പാരായണ സൗന്ദര്യം, ആശയ ഗാംഭീര്യം, മനഃപാഠ മികവ് എന്നിവ വിലയിരുത്തിയ സെക്ടര്‍തല മത്സരങ്ങള്‍ ബുഖാരിയ്യ മപ്രം, ഉമ്മുല്‍ ഖുറ വളപട്ടണം, മമ്പഉല്‍ ഹുദ കേച്ചേരി, മര്‍കസ് കാരന്തൂര്‍ എന്നീ നാല് ക്യാമ്പസുകളിലാണ് നടന്നത്.

വെള്ളിയാഴ്ച വൈകിട്ട് നാലിന് മര്‍കസ് കണ്‍വെന്‍ഷന്‍ സെന്ററില്‍ നടക്കുന്ന ചടങ്ങില്‍ ഇന്ത്യന്‍ ഗ്രാന്‍ഡ് മുഫ്തി കാന്തപുരം എ പി അബൂബക്കര്‍ മുസ്ലിയാര്‍ ഫെസ്റ്റ് ഉദ്ഘാടനം ചെയ്യും. ജാമിഅ മര്‍കസ് ചാന്‍സിലര്‍ സി മുഹമ്മദ് ഫൈസി, റെക്ടര്‍ മുഹമ്മദ് അബ്ദുല്‍ ഹകീം അസ്ഹരി, മര്‍കസ് ഡയറക്ടര്‍ സി പി ഉബൈദുല്ല സഖാഫി, എം എം ഐ സി എ ഒ. വി എം റശീദ് സഖാഫി, മര്‍കസ് ഖുര്‍ആന്‍ അക്കാദമി പ്രിന്‍സിപ്പല്‍ ഹാഫിള് അബൂബക്കര്‍ സഖാഫി, ഹനീഫ് സഖാഫി ആനമങ്ങാട്, ഹാഫിള് അബ്ദുസമദ് സഖാഫി മൂര്‍ക്കനാട് തുടങ്ങി ഖുര്‍ആന്‍ വിജ്ഞാനശാഖയില്‍ പാണ്ഡിത്യമുള്ള പ്രഗത്ഭര്‍ ഫെസ്റ്റിന്റെ വിവിധ സെഷനുകളില്‍ സംസാരിക്കും.

വിദേശ ഖുര്‍ആന്‍ പണ്ഡിതരായ ഖാരിഅ് ശൈഖ് ഫൗസി സഈദ് ഹൈകല്‍ ഈജിപ്ത്, ഖാരിഅ് ശൈഖ് ത്വാരിഖ് അബ്ദുല്‍ ഹാദി ഒമാന്‍, ഹബീബ് മഹ്ദി അബൂബക്കര്‍ അല്‍ ഹാമിദ് മലേഷ്യ തുടങ്ങിയവര്‍ പങ്കെടുക്കും. മുസാബഖതു മആരിഫില്‍ ഖുര്‍ആന്‍, മുസാബഖതു മആജിമില്‍ ഖുര്‍ആന്‍, മുസാബഖതു കലിമാതില്‍ ഖുര്‍ആന്‍ തുടങ്ങി കേരളത്തില്‍ വ്യാപകമല്ലാത്ത വിവിധ മത്സരങ്ങള്‍ അരങ്ങേറും. ഫെസ്റ്റിന്റെ ഭാഗമായി പൊതുജനങ്ങള്‍ക്കും കുടുംബങ്ങള്‍ക്കും വേണ്ടി മെഗാ ക്വിസ് അടക്കമുള്ള വിവിധ പരിപാടികള്‍ സംഘടിപ്പിച്ചിട്ടുണ്ട്. നവംബര്‍ 10 ഞായറാഴ്ച വൈകിട്ട് ഫെസ്റ്റ് സമാപിക്കും.

നാല് പതിറ്റാണ്ടിന്റെ പാരമ്പര്യമുള്ള മര്‍കസ് അക്കാദമി ഓഫ് ഖുര്‍ആന്‍ സ്റ്റഡീസ് കേരളത്തിലെ ആദ്യകാല ഖുര്‍ആന്‍ പഠന കേന്ദ്രമാണ്. പാരായണ ശാസ്ത്ര പ്രകാരം ഖുര്‍ആന്‍ ഹൃദിസ്ഥമാക്കിയ 2000 ത്തോളം വിദ്യാര്‍ഥികളാണ് ഇതിനകം ഇവിടെ പഠനം പൂര്‍ത്തീകരിച്ചത്.

ഈജിപ്ത്, ബഹ്റൈന്‍, യു എ ഇ, ലിബിയ, ജര്‍മനി, കുവൈത്ത്, താന്‍സാനിയ തുടങ്ങിയ വിവിധ രാജ്യങ്ങളിലെ അന്താരാഷ്ട്ര ഹോളി ഖുര്‍ആന്‍ അവാര്‍ഡ് മത്സരങ്ങളില്‍ നിരവധി തവണ മര്‍കസ് വിദ്യാര്‍ഥികള്‍ ഇന്ത്യയെ പ്രതിനിധീകരിക്കുകയും ഉന്നത വിജയം നേടുകയും ചെയ്തിട്ടുണ്ട്. യു എ ഇ മതകാര്യ വകുപ്പിന്റെ കീഴിലുള്ള മസ്ജിദുകളിലും വിവിധ സ്ഥലങ്ങളിലെ ഖുര്‍ആന്‍ പഠന കേന്ദ്രങ്ങളിലും പ്രധാന നഗരങ്ങളിലെ ഗ്രാന്‍ഡ് മസ്ജിദുകളിലും മര്‍കസ് പൂര്‍വ വിദ്യാര്‍ഥികള്‍ സേവനമനുഷ്ഠിക്കുന്നുണ്ട്.

വാര്‍ത്താ സമ്മേളനത്തില്‍ മര്‍കസ് മെമ്പര്‍ ഇന്‍സ്റ്റിറ്റിയൂഷന്‍സ് സി എ ഒ. വി എം റശീദ് സഖാഫി, മീഡിയ & കമ്മ്യൂണിക്കേഷന്‍ ഡിപ്പാര്‍ട്ട്‌മെന്റ് ജോയിന്റ് ഡയറക്ടര്‍ കെ കെ ശമീം, മര്‍കസ് ഖുര്‍ആന്‍ അക്കാദമി പ്രിന്‍സിപ്പല്‍ ഹാഫിള് അബൂബക്കര്‍ സഖാഫി പന്നൂര്‍, അഡ്മിനിസ്‌ട്രേറ്റിവ് ഓഫീസര്‍ ഹാഫിള് അബ്ദുസമദ് സഖാഫി മൂര്‍ക്കനാട് സംബന്ധിച്ചു.