ആട്ടിന്‍ തോലിട്ട ചെന്നായകളാണ് ബി ജെ പിയെന്ന് ന്യൂനപക്ഷങ്ങള്‍ തിരിച്ചറിയണം: ചെന്നിത്തല

തിരുവനന്തപുരം | ജബല്‍പൂരില്‍ മലയാളി വൈദികര്‍ക്ക് നേരെ സംഘ്പരിവാര്‍ സംഘടനകള്‍ നടത്തിയ അതിക്രമത്തില്‍ പ്രതിഷേധം രേഖപ്പെടുത്തി കോണ്‍ഗ്രസ്സ് വര്‍ക്കിംഗ് കമ്മിറ്റി അംഗം രമേശ് ചെന്നിത്തല. തെക്കേ ഇന്ത്യയില്‍ ക്രൈസ്തവരെ പ്രീണിപ്പിക്കാന്‍ ശ്രമിക്കുകയും വടക്കേ ഇന്ത്യയില്‍ അവരെ മാരകമായി ആക്രമിക്കുകയും ചെയ്യുന്ന ആട്ടിന്‍ തോലിട്ട ചെന്നായകളാണ് ബി ജെ പിയെന്ന് ന്യൂനപക്ഷങ്ങള്‍ തിരിച്ചറിയണമെന്ന് ചെന്നിത്തല പറഞ്ഞു.

ന്യൂനപക്ഷ ക്രിസ്ത്യന്‍ സമുദായാംഗങ്ങള്‍ക്ക് നേരെ സംഘ്പരിവാര്‍ ഉത്തരേന്ത്യയില്‍ സംഘടിതമായ ആക്രമണമാണ് അഴിച്ചുവിടുന്നത്. ആക്രമണം അങ്ങേയറ്റം അപലപനീയമാണ്. പോലീസിന്റെ മുന്നിലിട്ടാണ് ജയ് ശ്രീറാം മുദ്രാവാക്യങ്ങള്‍ വിളിച്ച സംഘം ക്രൂരമായ ആക്രമണം അഴിച്ചുവിടുന്നത്. എന്നിട്ട് പോലീസ് ഒന്നും ചെയ്യുന്നില്ല.

ജബല്‍പൂരില്‍ നിന്ന് പള്ളികളിലേക്ക് ബസില്‍ പോവുകയായിരുന്ന ക്രൈസ്തവ സഹോദരങ്ങളെ വിശ്വഹിന്ദു പരിഷത്ത് സംഘടനക്കാര്‍ തടഞ്ഞ് പോലീസ് സ്റ്റേഷനില്‍ കൊണ്ടുപോയ വിവരമറിഞ്ഞ് അവരെ സഹായിക്കാനെത്തിയ സീനിയര്‍ മലയാളി വൈദികരായ ഫാദര്‍ ഡോവിസ് ജോര്‍ജിനെയും ഫാദര്‍ ജോര്‍ജിനെയുമാണ് സംഘപരിവാറുകാര്‍ ക്രൂരമായി മര്‍ദിച്ചത്. ബി ജെ പിയുടെ കപടമുഖമാണ് ഇതിലൂടെ വെളിവാകുന്നത്. ന്യൂനപക്ഷങ്ങള്‍ രണ്ടാം തരം പൗരന്മാരല്ല. അവര്‍ക്കും ജീവിക്കാനും ആരാധിക്കാനും സ്വാതന്ത്ര്യമുണ്ടെന്നും രമേശ് ചെന്നിത്തല പറഞ്ഞു.