പൂനെയില്‍ നിന്നും കാണാതായ മലയാളി സൈനികനെ ബെംഗളുരുവില്‍ നിന്ന് കണ്ടെത്തി

കോഴിക്കോട്| പൂനെയില്‍ നിന്നും കാണാതായ മലയാളി സൈനികനെ ബെംഗളുരുവില്‍ നിന്ന് കണ്ടെത്തി. കോഴിക്കോട് എലന്തൂര്‍ കണ്ടംകുളങ്ങര സ്വദേശി വിഷ്ണുവിനെയാണ് കണ്ടെത്തിയത്. ഇന്നലെ രാത്രി 11 മണിയോടെ ബെംഗളുരു മജസ്റ്റിക് റെയില്‍വേ സ്റ്റേഷന്‍ പരിസരത്തു നിന്നാണ് വിഷ്ണുവിനെ കണ്ടെത്തിയതെന്നാണ് വിവരം.

സുഹൃത്തുക്കളില്‍ നിന്നാണ് വിഷ്ണുവിനെക്കുറിച്ച് പോലീസിന് വിവരം ലഭിച്ചതെന്നാണ് സൂചന. സാമ്പത്തിക ബുദ്ധിമുട്ടു കാരണം മാറി നില്‍ക്കുകയായിരുന്നുവെന്നാണ് വിഷ്ണു പോലീസിന് മൊഴി നല്‍കിയതെന്നാണ് റിപ്പോര്‍ട്ട്.

ഡിസംബര്‍ 17ന് നാട്ടിലേക്ക് വരുന്നുവെന്ന് വിഷ്ണു വീട്ടുകാരെ അറിയിച്ചിരുന്നു. 17ന് പുലര്‍ച്ചെ കണ്ണൂരില്‍ എത്തിയതായി മാതാവിന് സന്ദേശവും അയച്ചു. പിന്നീട് വിഷ്ണുവിനെക്കുറിച്ച് യാതൊരു വിവരവും ഉണ്ടായില്ല. തുടര്‍ന്ന് നടത്തിയ പരിശോധനയില്‍ ഫോണിന്റെ ലൊക്കേഷന്‍ മുംബൈയ്ക്ക് സമീപമാണെന്ന് കണ്ടെത്തിയിരുന്നു. ജനുവരി 11ന് വിഷ്ണുവിന്റെ വിവാഹം നിശ്ചയിച്ചിരുന്നതായാണ് വിവരം.