മോദി- ബൈഡൻ കൂടിക്കാഴ്ച 23ന്

ന്യൂഡൽഹി | ക്വാഡ് രാജ്യങ്ങളുടെ ഉച്ചകോടിയിൽ പങ്കെടുക്കാൻ പ്രധാനമന്ത്രി നരേന്ദ്ര മോദി അമേരിക്കയിലേക്ക്. യു എസ് പ്രസിഡന്റ്‌ജോ ബൈഡന്റെ അധ്യക്ഷതയിൽ നടക്കുന്ന ഉച്ചകോടിയിൽ ക്വാഡിലെ മറ്റ് അംഗ രാജ്യങ്ങളായ ആസ്‌ത്രേലിയയുടെയും ജപ്പാന്റെയും പ്രധാനമന്ത്രിമാരും പങ്കെടുക്കും.

അഫ്ഗാൻ ഉൾപ്പെടെയുള്ള വിഷയങ്ങൾ നിലനിൽക്കെ ഈ മാസം 24ന് വാഷിംഗ്ടണിലാണ് ഉച്ചകോടി നടക്കുന്നത്. ജപ്പാൻ പ്രധാനമന്ത്രി യോഷിഹിഡെ സുഗ, ആസ്‌ത്രേലിയൻ പ്രധാനമന്ത്രി സ്‌കോട്ട് മോറിസൺ എന്നിവരും വാഷിംഗ്ടണിലെത്തും. ബൈഡനുമായി ഈ മാസം 23ന് വൈറ്റ്ഹൗസിൽ മോദി കൂടിക്കാഴ്ച നടത്തും. മറ്റ് രാഷ്ട്ര നേതാക്കളുമായും മോദി ഉഭയകക്ഷി ചർച്ച നടത്തും.

ഈ മാസം 23 മുതൽ 25 വരെയാണ് മോദിയുടെ അമേരിക്കൻ സന്ദർശനം. ജോ ബൈഡൻ പ്രസിഡന്റായ ശേഷമുള്ള മോദിയുടെ ആദ്യ അമേരിക്കൻ സന്ദർശനമാണിത്. 25ന് ഐക്യരാഷ്ട്ര സഭയുടെ പൊതുസമ്മേളനത്തെ മോദി അഭിസംബോധന ചെയ്യും.