വെളിച്ചമേകിയത് പതിനഞ്ച് കോടിയോളം പേരുടെ ജീവിതത്തിന്; ശ്രദ്ധേയ ഇടപെടലുകളുമായി മുഹമ്മദ് ബിന്‍ റാഷിദ് അല്‍ മക്തൂം ഗ്ലോബല്‍ ഇനീഷ്യേറ്റീവിസ്

ദുബൈ | പ്രതിസന്ധികളെ നേരിടുന്ന ജനങ്ങള്‍ക്ക് കൈത്താങ്ങേകുന്ന മുഹമ്മദ് ബിന്‍ റാഷിദ് അല്‍ മക്തൂം ഗ്ലോബല്‍ ഇനീഷ്യേറ്റീവിസ് 2024ലെ പ്രവര്‍ത്തന റിപോര്‍ട്ട് പുറത്തിറക്കി. യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമാണ് എം ബി ആര്‍ ജി ഐയുടെ റിവ്യൂ റിപോര്‍ട്ട് പ്രസിദ്ധീകരിച്ചത്. ഇക്കഴിഞ്ഞ വര്‍ഷത്തിനിടെ 118 രാജ്യങ്ങളിലെ 15 കോടിയിലേറെ ആളുകളുടെ ജീവിതത്തിന് വെളിച്ചമേകുന്ന 220 കോടി ദിര്‍ഹത്തിന്റെ പദ്ധതികളാണ് എം ബി ആര്‍ ജി ഐ യാഥാര്‍ഥ്യമാക്കിയത്.

ദുബൈ വേള്‍ഡ് ട്രേഡ് സെന്ററില്‍ നടന്ന ചടങ്ങില്‍ ട്രസ്റ്റ് അംഗങ്ങള്‍, ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയും എം ബി ആര്‍ ജി ഐ വൈസ് ചെയര്‍മാനുമായ ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം, മന്ത്രിമാര്‍, ഉദ്യോഗസ്ഥര്‍ ഉള്‍പ്പടെയുള്ളവരുടെ സാന്നിധ്യത്തിലാണ് പ്രവര്‍ത്തന റിപോര്‍ട്ട് പുറത്തിറക്കിയത്. മുഹമ്മദ് ബിന്‍ റാഷിദ് ഗ്ലോബല്‍ ഇനീഷ്യേറ്റീവിസിന്റെ പ്രവര്‍ത്തനങ്ങള്‍ക്ക് പിന്തുണ നല്‍കുന്ന ജീവകാരുണ്യ പ്രവര്‍ത്തകരെ ചടങ്ങില്‍ ദുബൈ ഭരണാധികാരി പ്രത്യേകം പ്രശംസിച്ചു.

യു എ ഇ രാഷ്ട്രപിതാവ് ശൈഖ് സായിദിന്റെ നയങ്ങള്‍ ഉയര്‍ത്തിപ്പിടിക്കുന്നതിന് ജീവകാരുണ്യ പ്രവര്‍ത്തകര്‍ നല്‍കുന്ന പിന്തുണ പ്രശംസനീയമെന്ന് ശൈഖ് മുഹമ്മദ് ബിന്‍ റാഷിദ് അല്‍ മക്തൂം വ്യക്തമാക്കി. ഇതിന്റെ ഭാഗമായി നടപ്പാക്കിയ മദേഴ്‌സ് എന്‍ഡോവ്‌മെന്റ് കാമ്പയിന്‍, 100 കോടി മീല്‍സ് എന്‍ഡോവ്‌മെന്റ് കാമ്പയിന്‍ എന്നിവ പ്രത്യേകം എടുത്തുകാണേണ്ടതാണെന്നും അദേഹം പറഞ്ഞു. ഇക്കാലയളവില്‍ തറക്കല്ലിട്ട ഹമദാന്‍ ബിന്‍ റാഷിദ് കാന്‍സര്‍ ഹോസ്പിറ്റല്‍ യു എ ഇയുടെ മെഡിക്കല്‍ രംഗത്ത് നേട്ടമാകും. അര്‍ഹരായവര്‍ക്ക് പിന്തുണയേകുന്ന 30 ലേറെ പദ്ധതികള്‍ 2024ല്‍ നടപ്പാക്കാനായത് വലിയ പ്രതീക്ഷയാണ് നല്‍കുന്നതെന്നും അദേഹം പറഞ്ഞു. 2023നേക്കാള്‍ 400 മില്യണ്‍ ദിര്‍ഹത്തിന്റെ അധിക സഹായം എം ബി ആര്‍ ജി ഐക്ക് നടപ്പാക്കാനായി.

മുഹമ്മദ് ബിന്‍ റാഷിദ് ഗ്ലോബല്‍ ഇനീഷ്യേറ്റീവിസിന്റെ പദ്ധതികള്‍ക്ക് പിന്തുണ നല്‍കുന്ന ജീവകാരുണ്യ പ്രവര്‍ത്തകര്‍ രാഷ്ട്രപിതാവ് ശൈഖ് സായിദിന്റെ കാഴ്ചപ്പാടാണ് ഉയര്‍ത്തിപ്പിടിക്കുന്നതെന്ന് ശൈഖ് മുഹമ്മദ് ബിന്‍ റാഷിദ് അല്‍ മക്തൂം ചൂണ്ടിക്കാട്ടി. ഫാദേഴ്‌സ് എന്‍ഡോവ്‌മെന്റ് പദ്ധതിക്ക് പിന്തുണ നല്‍കിയ ലുലു ഗ്രൂപ്പ് ചെയര്‍മാന്‍ എം എ യൂസഫലി ഉള്‍പ്പടെയുള്ളവര്‍ക്ക് മുഹമ്മദ് ബിന്‍ റാഷിദ് അല്‍ മക്തൂം മെഡല്‍ ഫോര്‍ ഫിലാന്ത്രോപ്പി ശൈഖ് മുഹമ്മദ് സമ്മാനിച്ചു.