പാലക്കാട് കോട്ടായില്‍ അമ്മയെയും മകനെയും മരിച്ച നിലയില്‍ കണ്ടെത്തി

പാലക്കാട്|പാലക്കാട് കോട്ടായില്‍ അമ്മയെയും മകനെയും മരിച്ച നിലയില്‍ കണ്ടെത്തി. രോഗബാധിതയായ മാതാവ് മരിച്ച സങ്കടത്തില്‍ മകന്‍ ആത്മഹത്യ ചെയ്തതാകാമെന്നാണ് പ്രാഥമിക നിഗമനം. കോട്ടായി സ്വദേശി ചിന്നയും മകന്‍ ഗുരുവായൂരപ്പനുമാണ് മരിച്ചത്. ചിന്നയ്ക്ക് അഞ്ച് മക്കളാണുള്ളത്. ഇതില്‍ അഞ്ചാമത്തെ മകനാണ് ഗുരുവായൂരപ്പന്‍.

വീട്ടില്‍ അമ്മയും മകനും മാത്രമാണ് താമസിച്ചിരുന്നത്. കഴിഞ്ഞ അഞ്ച് ദിവസമായി ചിന്നയ്ക്ക് പനിയായിരുന്നു. ആശുപത്രിയില്‍ നിന്ന് മരുന്നും വാങ്ങിയിരുന്നു. ഇന്നലെ രാത്രി 10 മണി വരെ ചിന്നയുമായി അയല്‍വാസികള്‍ സംസാരിച്ചിരുന്നു.

ഇന്ന് രാവിലെ തൊട്ടടുത്തുള്ള പറമ്പില്‍ ഗുരുവായൂരപ്പനെ തൂങ്ങിമരിച്ച നിലയില്‍ നാട്ടുകാര്‍ കാണുകയായിരുന്നു. പിന്നീട് വീട്ടില്‍ വന്ന് നോക്കിയപ്പോഴാണ് അമ്മയും മരിച്ചു കിടക്കുന്നത് കണ്ടത്. അമ്മയുടെ മരണത്തില്‍ അസ്വാഭാവികതയൊന്നും കാണുന്നില്ലെന്ന് പോലീസ് വ്യക്തമാക്കി. അമ്മ മരിച്ചതറിഞ്ഞ് മനോവിഷമത്തില്‍ മകന്‍ ജീവനൊടുക്കിയതാകാമെന്നാണ് പ്രാഥമിക നിഗമനം. രണ്ട് മൃതദേഹങ്ങളും പോസ്റ്റ്‌മോര്‍ട്ടം ചെയ്യും. അതിന് ശേഷം മാത്രമേ കൂടുതല്‍ വിവരങ്ങള്‍ ലഭ്യമാകൂ.

(ശ്രദ്ധിക്കുക, ആത്മഹത്യ ഒന്നിനും പരിഹാരമല്ല, മാനസികാരോഗ്യവിദഗ്ധരുടെ സഹായം തേടാം. Helpline 1056. 0471 – 2552056)