പശു മാതാവും കാള പിതാവും; കാളയെ വാഹനത്തില്‍ കൊണ്ടുപോയ ഡ്രൈവര്‍ക്ക് ഹിന്ദുത്വവാദികളുടെ ക്രൂര മര്‍ദ്ദനം

ന്യൂഡല്‍ഹി | പശു ഞങ്ങളുടെ മാതാവാണെന്നും കാള പിതാവാണെന്നും ആക്രോശിച്ചുകൊണ്ട് കാളയെ വാഹനത്തില്‍ കൊണ്ടുപോയ ഡ്രൈവര്‍ക്ക് ഹിന്ദുത്വവാദികളുടെ ക്രൂര മര്‍ദ്ദനം. ഈ മാസം 18 ന് ഹരിയാനയിലെ നുഹ് ഏരിയയിലാണ് സംഭവം.

ഗൗ ഹമാരി മാതാ ഹേ (പശു ഞങ്ങളുടെ അമ്മയാണ്), ബെയില്‍ ഹമാരാ ബാപ് ഹേ (കാള ഞങ്ങളുടെ പിതാവാണ്) എന്ന് ആവര്‍ത്തിച്ച് ഉച്ചരിക്കാന്‍ ട്രക്ക് ഡ്രൈവറായ അര്‍മാന്‍ ഖാനോട് ആവശ്യപ്പെട്ടായിരുന്നു അക്രമികളുടെ മര്‍ദ്ദനം. ഡ്രൈവറെ മുട്ടുകുത്തിച്ച് നിര്‍ത്തി ശരീരത്തില്‍ ശക്തമായി അടിക്കുകയും മുടിയില്‍ പിടിച്ച് വലിക്കുകയും ചെയ്തു. അമര്‍ ഖാനെ മര്‍ദ്ദിക്കുന്ന ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചതോടെയാണ് സംഭവം പുറംലോകം അറിഞ്ഞത്.

പശുക്കടത്ത് ആരോപിച്ച് 25 വയസ്സുള്ള നസീറിനെയും 35 വയസ്സുള്ള ജുനൈദിനെയും ബജ്റംഗ്ദള്‍ അംഗങ്ങള്‍ തട്ടിക്കൊണ്ടുപോയി ചുട്ടുകൊന്ന 2023 ഫെബ്രുവരിയിലെ സംഭവം നടന്നതും ഹരിയാനയിലായിരുന്നു. സെന്റര്‍ ഫോര്‍ ദി സ്റ്റഡി ഓഫ് ഓര്‍ഗനൈസ്ഡ് ഹേറ്റ് പുറത്തുവിട്ട റിപ്പോര്‍ട്ട് അനുസരിച്ച് ഇന്ത്യയില്‍ ന്യൂനപക്ഷങ്ങളെ ലക്ഷ്യമിട്ടുള്ള ആക്രമണം ദിനംപ്രതി വര്‍ധിക്കുകയാണ്.

ഗോസംരക്ഷണത്തിന്റെ പേരില്‍ രാജ്യത്ത് വ്യാപകമായി കുറ്റകൃത്യങ്ങള്‍ നടക്കുന്നതായി റിപ്പോര്‍ട്ട് ചൂണ്ടിക്കാട്ടിയിരുന്നു.95 ശതമാനം ഗോസംരക്ഷകരും പ്രവര്‍ത്തിക്കുന്നത് ബി ജെ പി ഭരിക്കുന്ന സംസ്ഥാനങ്ങളിലാണ്. അതില്‍ പ്രധാനപ്പെട്ട സംസ്ഥാനങ്ങളില്‍ ഒന്നാണ് ഹരിയാന.