മുനമ്പം വഖഫ് ഭൂമി വിവാദത്തിൽ ഫറൂഖ് കോളജ് അധികൃതരുടെ മൗനം സംശയാസ്പദം: ഡോ. അബ്ദുൽ ഹക്കിം അസ്ഹരി

കോഴിക്കോട് | മുനമ്പം വഖ്ഫ് ഭൂമി വിവാദത്തില്‍ ഫറൂഖ് കോളജ് അധികൃതരുടെ മൗനം സംശയാസ്പദമെന്ന് എസ് വൈ എസ് സംസ്ഥാന ജനറല്‍ സെക്രട്ടറി ഡോ. എ പി അബ്ദുല്‍ ഹക്കീം അസ്ഹരി. ഈ വിഷയത്തില്‍ മുസ്ലിം-കൃസ്ത്യന്‍ വിഭാഗങ്ങള്‍ക്കിടയില്‍ സ്പര്‍ധയുണ്ടാക്കാന്‍ ചില കോണുകളില്‍ നിന്ന് ശ്രമങ്ങള്‍ നടക്കുന്നതായും അദ്ദേഹം പറഞ്ഞു. എസ് വൈ എസ് സംഘടിപ്പിച്ച മാനവസഞ്ചാരത്തിന്‍റെ ഭാഗമായി കോഴിക്കോട് മീഡിയാ വിരുന്നില്‍ സംസാരിക്കുകയായിരുന്നു അദ്ദേഹം.

മുനമ്പം വിഷയത്തില്‍ ഫാറൂഖ് കോളജ് അധികൃതര്‍ മൗനം ഭേദിച്ചാല്‍ പ്രശ്നപരിഹാരമുണ്ടാകും. മറ്റുള്ളവര്‍ അഭിപ്രായം പറയുന്നതിനേക്കാള്‍ നല്ലത് കൃത്യമായി പറയേണ്ട ആളുകള്‍ പറയുന്നതാണെന്നും അദ്ദേഹം പറഞ്ഞു. രേഖ പരിശോധിച്ച് കൃത്യമായ തീരുമാനമെടുക്കേണ്ടത് സര്‍ക്കാറിന്‍റെ കൂടി നേതൃത്വത്തിലാണ്. എന്നാല്‍ ഏതെങ്കിലും കാലത്ത് നടത്തിയിട്ടുള്ള കൃത്യവിലോപത്തിന്‍റെ അടിസ്ഥാനത്തില്‍ താമസക്കാരെ ഇറക്കിവിടണം എന്ന ആശയത്തോട് യോജിക്കാന്‍ കഴിയില്ല. നാടിന്‍റെ ക്രമസമാധാനവും സാമൂഹിക അന്തരീക്ഷവും കലുഷിതമാകുന്ന രീതിയിലുള്ള നീക്കങ്ങള്‍ ഉണ്ടാകുന്നത് ഒഴിവാക്കണമെന്നും അദ്ദേഹം അഭ്യര്‍ഥിച്ചു. വഖ്ഫ് സംരക്ഷണവും ക്രമസമാധാനവും മുഖ്യമാണ്. മുനമ്പത്തെ വഖ്ഫ് ഭൂമി എങ്ങനെ വിറ്റു എന്നത് വലിയ ചോദ്യമാണ്. എങ്ങനെ രജിസ്ട്രാര്‍ അത് രജിസ്ട്രര്‍ ചെയ്ത് കൊടുത്തു. പാവപ്പെട്ട ജനങ്ങളോട് കാശ് വാങ്ങി കച്ചവടം നടത്തിയതാണെങ്കില്‍ അത് തികച്ചും നാടിന്‍റെ നിയമത്തിനെതിരാണ്. ഫാറൂഖ് കോളാജാണ് വില്‍പ്പന നടത്തിയതെങ്കില്‍ അവരാണത് പരിഹരിക്കേണ്ടതെന്നും ഹക്കീം അസ്ഹരി പറഞ്ഞു.

എന്താണ് നടത്തിയതെന്ന് ഫറൂഖ് കോളജ് അധികൃതര്‍ വ്യക്തമാക്കണം. റിസോര്‍ട്ട് മാഫിയകള്‍ എങ്ങനെ വഖ്ഫ് ഭൂമി കൈക്കാലാക്കിയെന്നത് കൃത്യമായി പഠിക്കണം. കുടിയിറക്കപ്പെടുന്നവര്‍ക്ക് വീട് വെച്ച് കൊടുക്കേണ്ടത് സര്‍ക്കാറിന്‍റെ ഉത്തരവാദിത്വമാണ്. മുനമ്പം ഭൂമിയിലുള്ളവരെ പുനരവധിപ്പിക്കുന്നതിന് സഹായിക്കാന്‍ എസ് വൈ എസ് തയ്യാറാണെന്നും അദ്ദേഹം പറഞ്ഞു. മുമ്പത്തെ ഭൂമി വഖ്ഫ് ആണോ അല്ലയോ എന്നത് സംബന്ധിച്ച് ഒരു വ്യക്തിയല്ല അഭിപ്രായം പറയേണ്ടത്. പ്രശ്നം പരിഹരിക്കാന്‍ സര്‍ക്കാറിന് എല്ലാവരും സഹായം ചെയ്ത് കൊടുക്കണം. കൃസ്ത്യന്‍ നേതാക്കള്‍ക്ക് ഇക്കാര്യത്തില്‍ പ്രത്യേക റോളുണ്ടെന്ന് തോന്നുന്നില്ല. കൈയേറ്റക്കാരും വഖ്ഫിന്‍റെ ഉടമയും തമ്മിലുള്ള തര്‍ക്കമാണിത്. മതങ്ങള്‍ തമ്മിലുള്ള തര്‍ക്കമല്ല. എന്നാല്‍ പ്രശ്നങ്ങളില്ലാതെയിരിക്കുന്നതിന് നടക്കുന്ന ചര്‍ച്ചകള്‍ നല്ലതാണ്. വഖ്ഫ് സ്വത്തുകള്‍ അന്യാധീനപ്പെടുന്നതും കൈയേറുന്നതും ധാരാളമായി കണ്ടുവരികയാണ്. റഹ്മാന്‍ ഖാന്‍റെ നേതൃത്വത്തിലുള്ള പാര്‍ലിമെന്‍ററി കമ്മിറ്റി കൈയേറ്റത്തെ കുറിച്ച് വലിയ റിപ്പോര്‍ട്ട് സമര്‍പ്പിച്ചിട്ടുണ്ട്. അതില്‍ ഒന്നാമത്തെ കൈയേറ്റക്കാരായി സര്‍ക്കാറിനെയാണ് കണ്ടെത്തിയിരിക്കുന്നത്. കോഴിക്കോട്ടെ മൊയ്തീന്‍ പള്ളി, പട്ടാളപ്പള്ളി തുടങ്ങിയ സുന്നി വഖ്ഫുകള്‍ മറ്റ് ആശയക്കാര്‍ കൈയേറിയതാണ്. വഖ്ഫ് പരിഷ്കരണവുമായി ബന്ധപ്പെട്ട് സമസ്തയുടെ അഭിപ്രായങ്ങള്‍ ആധികാരികമായി സംയുക്ത പാര്‍ലിമെന്‍ററി സമിതി(ജെ പി സി)ക്ക് കൈമാറിയിട്ടുണ്ട്. ബില്ലും മുനമ്പം വിഷയവുമായി യാതൊരു ബന്ധവുമില്ലെന്നും അദ്ദേഹം പറഞ്ഞു.

രാഷ്ട്രീയ പാര്‍ട്ടികളും നേതാക്കളും പരസ്പരം വിമര്‍ശിക്കുമ്പോള്‍ മിതത്വം പാലിക്കണം. വിമര്‍ശനത്തിന് ആരും അതീതരല്ല. എന്നാല്‍ വിമര്‍ശനങ്ങള്‍ ക്രിയാത്മകമാകണം. പാണക്കാട് സ്വാദിഖലി തങ്ങളും പിണറായി വിജയനും രാഷ്ട്രീയ പാര്‍ട്ടി നേതാക്കളാണെന്നും അദ്ദേഹം ചോദ്യത്തിനുത്തരമായി പറഞ്ഞു. രാഷ്ട്രീയ ഉത്തരവാദിത്വങ്ങള്‍ വര്‍ധിച്ചുവരുന്ന സാഹചര്യത്തില്‍ രാഷ്ട്രീയ പാര്‍ട്ടികള്‍ ജാഗ്രതയോടെ അവ പ്രയോഗവത്കരിക്കാന്‍ തയ്യാറാകണം. മാനവിക സാഹോദര്യത്തെ നിഷ്പ്രഭമാക്കാനുള്ള ശ്രമങ്ങള്‍ ചില കോണുകളില്‍ നിന്ന് ഉയര്‍ന്നുവരുമ്പോള്‍ അവയെ ഇല്ലാതാക്കി രാജ്യത്തിന്‍റെ പാരമ്പര്യം കാത്ത് സൂക്ഷിക്കുകയെന്നതാണ് മാനവ സഞ്ചാരത്തിന്‍റെ ലക്ഷ്യം. വര്‍ഗീയതയിലൂടെ വെറുപ്പിന്‍റെയും വിദ്വേഷത്തിന്‍റെയും പ്രചാരണങ്ങള്‍ നടത്തുന്നവരാണ് മനുഷ്യത്വ രഹിതമായ രാഷ്ട്രീയം പ്രചരിപ്പിക്കുന്നത്. ഏതെങ്കിലും ഒരു വിഭാഗത്തെ പേരെടുത്ത് പറഞ്ഞ് കൂടുതല്‍ ധ്രുവീകരണം ഉണ്ടാക്കുന്നതിനേക്കാള്‍ നല്ലത് സമൂഹത്തെ ഒന്നിച്ച് സംസ്കരിക്കുന്ന രീതിയാണെന്നും അദ്ദേഹം പറഞ്ഞു.

എസ് വൈ എസ് സംസ്ഥാന പ്രസിഡന്‍റ് സയ്യിദ് ത്വാഹാ തങ്ങള്‍ സഖാഫി, വൈസ് പ്രസിഡന്‍റ് സ്വാദിഖ് സഖാഫി പെരിന്താറ്റിരി വിവിധ മാധ്യമങ്ങളിലെ പ്രതിനിധികള്‍ പങ്കെടുത്തു.

മാനവ സഞ്ചാരത്തിന്‍റെ അഞ്ചാം ദിനമായ ഇന്ന് കോഴിക്കോട് ജില്ലയിലാണ് പര്യടനം നടക്കുന്നത്. രാവിലെ 14 സോണ്‍ കേന്ദ്രങ്ങളില്‍ ഏര്‍ളി ബേര്‍ഡ്സ് നടന്നു. യുവജന സംഘടനാ നേതാക്കള്‍, പൗരപ്രമുഖര്‍, മാധ്യമ പ്രവര്‍ത്തകര്‍ എന്നിവരുമായി യാത്രാ നായകന്‍ സംവദിച്ചു. വൈകിട്ട് നാല് മണിക്ക് ജാഫര്‍ഖാന്‍ കോളനി പരിസരത്ത് നിന്ന് സൗഹൃദ നടത്തം ആരംഭിക്കും. എം പി, എം എല്‍ എമാര്‍, വിവിധ സമുദായ നേതാക്കള്‍, പാര്‍ട്ടി നേതാക്കള്‍, സാംസ്കാരിക പ്രവര്‍ത്തകര്‍, പ്രസ്ഥാന നായകര്‍ അണിനിരക്കും.

തുടര്‍ന്ന് മുതലക്കുളത്ത് നടക്കുന്ന മാനവ സംഗമം സമസ്ത സെക്രട്ടറി സയ്യിദ് ഇബ്രാഹീം ഖലീല്‍ അല്‍ ബുഖാരിയുടെ അധ്യക്ഷതയില്‍ എം കെ രാഘവന്‍ എം പി ഉദ്ഘാടനം ചെയ്യും.