പാലായിലെ കൊലപാതകം; പ്രതിയുടെ അറസ്റ്റ് രേഖപ്പെടുത്തി

കോട്ടയം | പാലായില്‍ സഹപാഠിയെ കഴുത്തറുത്ത് കൊലപ്പെടുത്തിയ കേസില്‍ പ്രതി അഭിഷേകിന്റെ അറസ്റ്റ് രേഖപ്പെടുത്തി. പ്രതി അഭിഷേക് ബൈജുവിനെ നാളെ പാലാ സെന്റ് തോമസ് കോളേജിലെത്തിച്ച് തെളിവെടുപ്പ് നടത്തും.

പാല സെന്റ് തോമസ് കോളജിലെ വിദ്യാര്‍ഥിനിയും തലയോലപ്പറമ്പ് സ്വദേശിനിയുമായ ലിബിനാ മോള്‍ (22)ആണ് കൊല്ലപ്പെട്ടത്. മറ്റ് വിദ്യാര്‍ഥികളുടെ മുന്നില്‍ വെച്ച് രാവിലെ 11ഓടെയായിരുന്നു ക്രൂരമായ കൊലപാതകം.

കോളജില്‍ പരീക്ഷ കഴിഞ്ഞിറങ്ങിയ ലിബിന മോളെ സഹപാഠിയും വൈക്കം സ്വദേശിയുമായി അഭിഷേക്ബൈജുകോളജ് ക്യാമ്പസിനുള്ളില്‍ വെച്ച് പേപ്പര്‍ കട്ടര്‍ കൊണ്ട് ആക്രമിക്കുകയായിരുന്നു. പെണ്‍കുട്ടിയെ ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പ്രണയ നൈരാശ്യമാണ് കൊലക്ക് കാരണമെന്ന് പോലീസ് പറഞ്ഞു. അഭിഷേകിനെ കസ്റ്റഡിയിലെടുത്ത പോലീസ് ചോദ്യം ചെയ്യല്‍ തുടരുകയാണ്. ഇരുവരും അവസാന വര്‍ഷ ബിരുദ വിദ്യാര്‍ഥികളാണ്.