സൊമാറ്റോയിൽ പുതിയ ഫീച്ചർ; ഭക്ഷണം ഇനി നേരത്തെ ബുക്ക് ചെയ്യാം

മുംബൈ | ഓൺലൈൻ ഫുഡ് ഡെലിവറി ആപ്പ് സൊമാറ്റോ (Zomato) ഉപഭോക്താക്കൾക്കായി ഒരു പ്രത്യേക ഫീച്ചർ അവതരിപ്പിച്ചു. ഉപഭോക്താക്കൾക്ക് അവരുടെ ഓർഡറുകൾ രണ്ട് ദിവസം മുമ്പ് ഷെഡ്യൂൾ ചെയ്യാൻ കഴിയുന്ന സംവിധാനമാണ് അവതരിപ്പിച്ചിരിക്കുന്നത്. ഇനി മുതൽ നിങ്ങളുടെ സൗകര്യത്തിനനുസരിച്ച് ഭക്ഷണം മുൻകൂട്ടി ബുക്ക് ചെയ്യാൻ കഴിയും എന്നതാണ് ഇതിന്റെ സവിശേഷത.

30 വലിയ നഗരങ്ങളിലാണ് സൊമാറ്റോ ആദ്യ ഘട്ടത്തിൽ ഈ സൗകര്യം ആരംഭിച്ചത്. ഡൽഹി എൻസിആർ, ബംഗളൂരു, മുംബൈ, അഹമ്മദാബാദ്, ചണ്ഡിഗഡ്, പൂനെ, റായ്പൂർ, ലഖ്‌നൗ, ജയ്പൂർ എന്നിവിടങ്ങളിൽ സേവനം ലഭ്യമാണ്. ഈ വ്യത്യസ്ത നഗരങ്ങളിലെ ഏകദേശം 35,000 ത്തിലധികം റെസ്റ്റോറൻ്റുകളിൽ ഈ സൗകര്യം ലഭ്യമാകും.

ഏതാനും മണിക്കൂറുകൾക്കുള്ളിൽ അല്ലെങ്കിൽ ഏതാനും ദിവസങ്ങൾക്കുള്ളിൽ നിങ്ങൾക്ക് ഇഷ്ടപ്പെട്ട സമയത്ത് നിങ്ങളുടെ ഓർഡർ ഷെഡ്യൂൾ ചെയ്യാനാകും. ചെക്ക്ഔട്ട് സമയത്ത് നിങ്ങളോട് ഒരു ടൈം സ്ലോട്ട് ക്രമീകരിക്കാൻ ആവശ്യപ്പെടും. ഇതനുസരിച്ച് ആ സമയത്ത് അപ്പോൾ തയ്യാറാക്കിയ ഭക്ഷണം നിങ്ങൾക്ക് എത്തിക്കും.