ഷാർജയിൽ സർക്കാർ ജീവനക്കാർക്ക് പുതിയ വേതന വ്യവസ്ഥ

ഷാർജ|ഷാർജയിൽ സർക്കാർ ജീവനക്കാർക്ക് പുതിയ വേതന വ്യവസ്ഥ ഭരണാധികാരി ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി അംഗീകരിച്ചു. പൊതു ജോലികൾക്കായി സമഗ്രമായ വേതന വ്യവസ്ഥയാണ് ഒരുക്കിയതെന്ന് ഷാർജ മാനവ വിഭവശേഷി വകുപ്പ് മേധാവി അബ്ദുല്ല ഇബ്്റാഹിം അൽ സആബി പറഞ്ഞു. “സ്‌പെഷ്യൽ എ’, “സ്‌പെഷ്യൽ ബി’ എന്നീ രണ്ട് പുതിയ ഗ്രേഡുകളുണ്ടാകും. എല്ലാ തൊഴിൽ തലങ്ങളിലും ഓരോ ജോബ് ഗ്രേഡിലും നാല് വർഷത്തെ കാലാവധിയും അവതരിപ്പിക്കുന്നു.

പുതിയ ശമ്പള സ്‌കെയിൽ തൊഴിൽ സുരക്ഷ വർധിപ്പിക്കുകയും സർക്കാർ മേഖലയിലെ ഇമാറാത്തി പൗരന്മാർക്ക് കരിയർ പുരോഗതിക്ക് വ്യക്തമായ വഴികൾ നൽകുകയും ചെയ്യുമെന്ന് പ്രതീക്ഷിക്കുന്നു. ഗവൺമെന്റിൽ ജോലി ചെയ്യുന്ന എൻജിനീയർമാർക്കായി പ്രത്യേകമായി പുതുക്കിയ ശമ്പള സ്‌കെയിൽ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി അംഗീകരിച്ചു. ഇതിൽ ഒരു പുതിയ “സ്‌പെഷ്യൽ’ ഗ്രേഡ് അവതരിപ്പിക്കുന്നതും നിലവിലുള്ള ജോലി തലങ്ങളിൽ പുരോഗതി വരുത്തുന്നതും ഉൾപ്പെടുന്നു. എൻജിനീയറിംഗ് തസ്തികകൾക്ക് ഓരോ തലത്തിലും നാല് വർഷത്തെ കാലാവധിയുള്ള ശമ്പള സ്‌കെയിൽ വ്യവസ്ഥ ചെയ്യുന്നു.

“ബന്ധപ്പെട്ട വകുപ്പുകളുമായി ഏകോപിപ്പിച്ച ശേഷം ഷാർജ സർക്കാരിലെ പൊതു ജോലികൾക്കും പ്രൊഫഷനൽ എൻജിനീയർമാർക്കും ശമ്പള സ്‌കെയിലുകൾ സംബന്ധിച്ച ഷാർജ ഭരണാധികാരിയുടെ പുതിയ നിർദേശങ്ങൾ ഞങ്ങൾ നടപ്പിലാക്കാൻ തുടങ്ങും. കൂടുതൽ പരിശ്രമവും സമർപ്പണവും ചെലുത്താൻ ഷാർജ സർക്കാർ ജീവനക്കാരോട് അഭ്യർഥിക്കുന്നു-‘ അദ്ദേഹം പറഞ്ഞു.