സോളാര്‍ സമരം അവസാനിപ്പിക്കാന്‍ ഇടനിലക്കാരനായിട്ടില്ലെന്ന് എന്‍ കെ പ്രേമചന്ദ്രന്‍ എം പി

കൊല്ലം | ഇടതു മുന്നണി നടത്തിയ സോളാര്‍ സമരം അവസാനിപ്പിക്കുന്നതിനായി ഇടനില ചര്‍ച്ചയില്‍ താന്‍ പങ്കെടുത്തെന്ന മനോരമ മുന്‍ ബ്യൂറോ ചീഫ് ജോണ്‍ മുണ്ടക്കയത്തിന്റെ വെളിപ്പെടുത്തല്‍ തള്ളി എന്‍ കെ പ്രേമചന്ദ്രന്‍ എം പി.

തന്നെ ആരും ഇടനില നില്‍ക്കാന്‍ ചുമതലപ്പെടുത്തിയിട്ടില്ലെന്നും മുണ്ടക്കയം പറഞ്ഞത് ശരിയല്ലെന്നും അദ്ദേഹം പറഞ്ഞു. ഒരു സമരം നടക്കുമ്പോള്‍ അത് അവസാനിപ്പിക്കാന്‍ ചര്‍ച്ച നടക്കുന്നത് സ്വാഭാവികമാണ്. അതിനിടയില്‍ എന്തെങ്കിലും കൊടുക്കല്‍ വാങ്ങല്‍ ഉണ്ടായതായി ആരോപണം ഇതുവരെ ആരും ഉന്നയിച്ചിട്ടില്ലെന്നും എന്‍ കെ പ്രേമചന്ദ്രന്‍ ചൂണ്ടിക്കാട്ടി.

താന്‍ സമരക്കാരെ അഭിസംബോധന ചെയ്ത് സംസാരിച്ചുകൊണ്ടിരിക്കെയാണ് ആര്‍ എസ് പി പ്രതിനിധിയായി എ കെ ജി സെന്ററില്‍ യോഗത്തിന് പോകാന്‍ ആവശ്യപ്പെട്ടത്. അവിടെയെത്തിയപ്പോഴേക്കും സമരം അവസാനിപ്പിക്കാനുള്ള തീരുമാനം മുന്നണി നേതൃത്വം എടുത്തിരുന്നു. ഈ സമയത്ത് ഉമ്മന്‍ചാണ്ടിയുടെ വാര്‍ത്താ സമ്മേളനം കാണാന്‍ എല്‍ ഡി എഫ് നേതാക്കളുടെ മുറിയില്‍ ടെലിവിഷന്‍ വച്ച് കാത്തു നില്‍ക്കുകയായിരുന്നു നേതാക്കള്‍.

പിന്നീട് പിണറായി വിജയന്റെ നേതൃത്വത്തില്‍ താനടക്കമുള്ളവര്‍ സമരമുഖത്തെത്തി സമരം അവസാനിപ്പിക്കുന്നതായി പ്രഖ്യാപിക്കുകയായിരുന്നു. ജുഡീഷ്യല്‍ അന്വേഷണ പരിധിയില്‍ മുഖ്യമന്ത്രിയുടെ ഓഫീസിനെ കൂടി ഉള്‍പ്പെടുത്താനുള്ള ടേംസ് ഓഫ് റഫറന്‍സ് എല്‍ ഡി എഫ് ആവശ്യപ്പെട്ടത് പ്രകാരം തയ്യാറാക്കിയത് താനാണെന്നും എന്‍ കെ പ്രേമചന്ദ്രന്‍ വാര്‍ത്താ സമ്മേളനത്തില്‍ അറിയിച്ചു.