Kerala
വിദ്വേഷ പരാമര്ശത്തില് പി സി ജോര്ജിന് മുന്കൂര് ജാമ്യമില്ല
പ്രകോപനപരമായ പരാമര്ശമാണ് പിസി ജോര്ജ് നടത്തിയതെന്നും മുന്കൂര് ജാമ്യം നല്കരുതെന്നും സര്ക്കാര് വാദിച്ചിരുന്നു

കൊച്ചി | മുസ്ലിം വിദ്വേഷ പരാമര്ശ കേസില് ബി ജെ പി നേതാവ് പി സി ജോര്ജിന്റെ മുന്കൂര് ജാമ്യാപേക്ഷ തള്ളി ഹൈക്കോടതി. നേരത്തേ ഹരജി കോട്ടയം ജില്ലാ സെഷന്സ് കോടതിയും തള്ളിയിരുന്നു. നിരന്തരം ജാമ്യ വ്യവസ്ഥ ലംഘിച്ചുവെന്നതിനാല് മുന്കൂര് ജാമ്യം നല്കില്ലെന്നാണ് സിംഗിള് ബെഞ്ച് വ്യക്തമാക്കി. ജാമ്യം ലഭിക്കാത്തതിനാല് ഉടന് അറസ്റ്റ് ഉണ്ടായേക്കുമെന്നാണ് സൂചന.
പി സി ജോര്ജ് മുമ്പും മതവിദ്വേഷം വളര്ത്തുന്ന കുറ്റം ചെയ്തിട്ടുണ്ടെന്ന് ഹൈക്കോടതി നിരീക്ഷിച്ചു. ഈരാറ്റുപേട്ട പോലീസ് രജിസ്റ്റര് ചെയ്ത കേസിലെ മുന്കൂര് ജാമ്യാപേക്ഷയില് ബുധനാഴ്ച വാദം പൂര്ത്തിയായിരുന്നു. വിധി പറയാന് ഇന്നത്തേക്ക് മാറ്റിയ കേസ് ജസ്റ്റിസ് പി വി കുഞ്ഞികൃഷ്ണന് അധ്യക്ഷനായ സിംഗിള് ബെഞ്ചാണ് പരിഗണിച്ചത്.
പി സി ജോര്ജിന്റെ പരാമര്ശം ഗൗരവതരമാണ്. 40 വര്ഷം എം എല് എ ആയിരുന്ന അനുഭവ സമ്പത്തുള്ള മുതിര്ന്ന രാഷ്ട്രീയ നേതാവാണ് പിസി ജോര്ജ്. വിവാദ പരാമര്ശം നടത്തുമ്പോള് മുന് ജാമ്യ വ്യവസ്ഥ മനസ്സിലുണ്ടായിരുന്നില്ലെന്ന് പറയാനാകില്ലെന്നും ഹൈക്കോടതി നിരീക്ഷിച്ചു. നിരന്തരം അബദ്ധമാണ് പി സി ജോര്ജിന്റെതെന്നും ഹൈക്കോടതി വിമര്ശിച്ചു. അബദ്ധമാണ് പറ്റിയതെന്ന പി സി ജോര്ജിന്റെ അഭിഭാഷകന്റെ വാദം ഹൈക്കോടതി അംഗീകരിച്ചില്ല.
മതവിദ്വേഷം വളര്ത്തുന്ന പ്രസ്താവന നടത്തിയതിന് നാല് കുറ്റകൃത്യങ്ങള് പി സി ജോര്ജിനെതിരെ രജിസ്റ്റര് ചെയ്തിട്ടുണ്ടെന്നാണ് പോലീസ് ഹൈക്കോടതിയെ അറിയിച്ചത്. പ്രകോപനപരമായ പരാമര്ശമാണ് പിസി ജോര്ജ് നടത്തിയതെന്നും മുന്കൂര് ജാമ്യം നല്കരുതെന്നും സര്ക്കാര് വാദിച്ചിരുന്നു.