സമസ്തയെ ആര്‍ക്കും ഹൈജാക്ക് ചെയ്യാനാകില്ല: ജിഫ്രി മുത്തുക്കോയ തങ്ങള്‍

കോഴിക്കോട് | സമസ്തയെ ആര്‍ക്കും ഹൈജാക്ക് ചെയ്യാനാകില്ലെന്ന് ഇ കെ വിഭാഗം സമസ്ത പ്രസിഡന്റ് ജിഫ്രി മുത്തുക്കോയ തങ്ങള്‍. രാഷ്ട്രീയ പ്രസ്ഥാനങ്ങളില്‍ ആളെ ഉണ്ടാക്കലല്ല സമസ്തയുടെ ജോലിയെന്നും കോഴിക്കോട് വാര്‍ത്താസമ്മേളനം നടത്തുന്നതിനിടെ തങ്ങള്‍ പറഞ്ഞു. സമസ്തയുടേത് ആത്മീയ പ്രവര്‍ത്തനമാണ്. രാഷ്ട്രീയം സമസ്ത പഠിപ്പിക്കേണ്ടതില്ല. സമസ്ത സ്ഥാപനങ്ങളില്‍ രാഷ്ട്രീയം പഠിപ്പിക്കാറില്ല. മാര്‍കിസ്റ്റ് പാര്‍ട്ടിക്കോ, ലീഗിനോ എതിരല്ല ഞങ്ങള്‍. കമ്മ്യൂണിസത്തിനെതിരായ പ്രമേയ വിഷയത്തില്‍ കൂടുതല്‍ പ്രതികരിക്കുന്നില്ല. തനിക്ക് പറനായുള്ളത് ഇന്നലെ പറഞ്ഞു. പ്രസിഡന്റും ജനറല്‍ സെക്രട്ടറിയും പറയുന്നതാണ് സമസ്തയുടെ ഔദ്യോഗിക അഭിപ്രായമെന്നും ജിഫ്രി തങ്ങള്‍ പറഞ്ഞു.