നവംബർ നൽകും കുളിരേകും കാഴ്‌ച; ഈ മാസം കാണാവുന്ന സുന്ദരമായ സ്ഥലങ്ങൾ ഇതാ...

ഇന്ത്യയിൽ സുഖകരമായ കാലാവസ്ഥയും അതിമനോഹരമായ പ്രകൃതിദൃശ്യങ്ങളും സമ്മാനിക്കുന്ന മാസമാണ് നവംബർ.ലക്ഷദ്വീപിലെ ഭംഗിയുള്ള ബീച്ചുകൾ മുതൽ കശ്മീരിലെ മോഹിപ്പിക്കുന്ന മലനിരകൾ വരെ സഞ്ചാരികൾക്ക് നവംബർ മാസം ദൃശ്യചാരുതയൊരുക്കുന്നു. നവംബർ കരുതിവച്ചിരിക്കുന്ന അവിസ്മരണീയമായ യാത്രാനുഭവം നൽകുന്ന ചില സ്ഥലങ്ങൾ ഇതാ…

നവംബർ മാസമാണ് ഗോവ സന്ദർശിക്കാൻ പറ്റിയ സമയം. സുഖകരമായ കാലാവസ്ഥയും തിരക്ക് കുറവും ഈ സമയത്തെ പ്രത്യേകതയാണ്‌.പീക്ക് സീസണിനേക്കാൾ കുറഞ്ഞ വിലയിൽ ഹോട്ടലുകളും മറ്റും ലഭിക്കും എന്നതും നവംബർ ഗോവ സന്ദർശിക്കാൻ പറ്റിയ സമയമാക്കുന്നു.
ബീച്ചിനെ സ്നേഹിക്കുന്ന ഏതൊരാൾക്കും ലക്ഷദ്വീപ് ഒരു പറുദീസയാണ്.വാട്ടർ സ്‌പോർട്ടുകൾ പരീക്ഷിച്ച് ഒരു അവിസ്‌മരണീയമായ യാത്ര ആഘോഷിക്കാം. മണൽ നിറഞ്ഞ തീരങ്ങളിൽ വിശ്രമിക്കുകയും സൂര്യനെ ആവോളം ആസ്വദിക്കുകയും ചെയ്യാം.

നവംബറിൽ ലക്ഷദ്വീപിലും താരതമ്യേന തിരക്ക്‌ കുറവാണ്‌.കശ്മീരിലെ ഗുൽമാർഗ് ഇന്ത്യയിലെ ഏറ്റവും മനോഹരമായ സ്ഥലങ്ങളിൽ ഒന്നാണ്. നവംബറിൽ, സീസണിലെ ആദ്യത്തെ മഞ്ഞ് അനുഭവിക്കാനും സ്കീയിംഗ്, സ്നോബോർഡിംഗ് പോലുള്ള പ്രവർത്തനങ്ങൾ ആസ്വദിക്കാനും കഴിയും.

ഹിമാചൽ പ്രദേശിലെ സ്പിതി താഴ്‌വര സാഹസികർക്കും യാത്രാപ്രേമികൾക്കും മികച്ച ഇടമാണ്‌. വിസ്മയിപ്പിക്കുന്ന മഞ്ഞുമൂടിയ താഴ്‌വരകളും ആശ്രമങ്ങളും സ്‌പിതിയുടെ ആകർഷണമാണ്‌.
രാജ്യത്തിൻ്റെ വടക്കുകിഴക്കൻ മേഖലയിൽ സ്ഥിതി ചെയ്യുന്ന തവാങ്ങിൽ, മഞ്ഞുകാലത്തിൻ്റെ തുടക്കത്തിലുള്ള മഞ്ഞുവീഴ്ച നവംബറിൽ ആരംഭിക്കും.അതിമനോഹരമായ വെളുത്ത പർവതങ്ങൾ തവാങ്ങിൻ്റെ ഭംഗി കൂട്ടുന്ന സമയമാണിത്‌. ഇവിടുത്തെ വെള്ളപുതച്ച ആശ്രമങ്ങളും മനം കവരും.

തണുത്ത കാലാവസ്ഥയും മഞ്ഞുമൂടിയ മലനിരകളുമുള്ള നൈനിറ്റാൾ നവംബറിൽ തീർച്ചയായും സന്ദർശിക്കേണ്ട സ്ഥലമാണ്. മഞ്ഞുമൂടിയ കൊടുമുടികളുടെ പശ്ചാത്തലത്തിലുള്ള നൈനി തടാകത്തിലെ ബോട്ടിംഗ് ജീവിതകാലം മുഴുവൻ താലോലിക്കാവുന്ന ഒന്നാണ്.

സുഖകരമായ അന്തരീക്ഷം കാരണം നവംബറിൽ വടക്കുകിഴക്കൻ ഇന്ത്യയിൽ സന്ദർശിക്കാൻ പറ്റിയ സ്ഥലങ്ങളിൽ ഒന്നാണ് ഷില്ലോംഗ്. ഒക്‌ടോബർ മുതൽ മാർച്ച് വരെയുള്ള സമയമാണ് ഗോകർണത്തിൻ്റെ സൗന്ദര്യം അനുഭവിക്കാൻ ഏറ്റവും അനുയോജ്യമായ സമയം.