പരിശോധന എന്തിന് വേണ്ടിയെന്ന് ഉദ്യോഗസ്ഥര്‍ വ്യക്തമാക്കണം; എ എ റഹീമിന്റെ സംസ്‌കാരമല്ല തനിക്ക്: ഷാനിമോള്‍ ഉസ്മാന്‍

പാലക്കാട്  | എന്ത് കണ്ടെത്താനാണ് താന്‍ താമസിക്കുന്ന ഹോട്ടല്‍ മുറിയില്‍ കയറി പരിശോധന നടത്തിയതെന്ന് പോലീസ് ഉദ്യോഗസ്ഥര്‍ വ്യക്തമാക്കണമെന്ന് ഷാനിമോള്‍ ഉസ്മാന്‍. തിരിച്ചറിയല്‍ കാര്‍ഡ് പോലും കാണിക്കാന്‍ എത്തിയവര്‍ തയാറായില്ലെന്നും ഷാനിമോള്‍ മാധ്യമങ്ങളോട് പ്രതികരിച്ചു

പരിശോധനക്കെത്തിയവര്‍ വിമാനത്താവളത്തിലെ പരിശോധനയെന്ന പോലെ എന്റെ ശരീരം പരിശോധിച്ചു. മുറിക്കകത്തുള്ള മുഴുവന്‍ സാധനങ്ങളും അവരെടുത്തു പരിശോധിച്ചു. കിടക്കയെല്ലാം മറിച്ചിട്ട് നോക്കി, ടോയ്ലറ്റിലും പരിശോധന നടത്തി.ഈ പെട്ടി എങ്ങനെയാണ് കൊണ്ടുവന്നതെന്ന് ചോദിച്ചു. കാളവണ്ടിയിലാണെന്ന് ഞാന്‍ മറുപടി പറഞ്ഞു. അവര്‍ പോകാന്‍ നേരം ഞാന്‍ പറഞ്ഞു, നിങ്ങളെ പോകാന്‍ ഞാന്‍ അനുവദിക്കത്തില്ല. ഇതിനകത്ത് നിങ്ങള്‍ എന്തിന് കയറി, എന്ത് കണ്ടു, എന്ത് കിട്ടി അത് രേഖാമൂലം എഴുതിത്തരാതെ പോകാന്‍ അനുവദിക്കില്ല എന്ന് പറഞ്ഞു. അവര്‍ പോകാന്‍ നേരം ഞങ്ങള്‍ തടസം സൃഷ്ടിച്ചു എന്ന് പറയുന്നത് നേരാണ്. ഏത് ഉദ്യോഗസ്ഥരെ വിളിച്ചാലും രേഖാമൂലം എഴുതി കിട്ടാതെ ഈ മുറിയില്‍ നിന്ന് പോകാനാകില്ലെന്ന് തീര്‍ത്ത് പറഞ്ഞു.അപ്പോള്‍ ഇവിടെ വലിയ ബഹളമായി, അവര്‍ എഴുതി തരാമെന്ന് പറഞ്ഞു. എഎ റഹിം ചോദിക്കുന്നത്, കതകില്‍ മുട്ടിയപ്പോള്‍ എന്താണ് തുറക്കാഞ്ഞത് എന്നാണ്. എഎ റഹിമിന്റെ സംസ്‌കാരമല്ല എനിക്കുള്ളത്. എന്റെ മുറി എപ്പോള്‍ തുറക്കണം അല്ലെങ്കില്‍ ആരെ ഞാന്‍ കാണണമെന്നുള്ളത് എന്റെ തീരുമാനമാണ്. എന്നെ സംബന്ധിച്ച് മറ്റാരോപണങ്ങളോടൊന്നും ഞാന്‍ മറുപടി പറയുന്നില്ലെന്നും ഷാനിമോള്‍ ഉസ്മാന്‍ പറഞ്ഞു