ഫുജൈറയിൽ എണ്ണ ചോർച്ച; പരിസ്ഥിതി മന്ത്രാലയം അന്വേഷണം ആരംഭിച്ചു

ദുബൈ | ഫുജൈറയിലെ ദ്വീപിൽ എണ്ണ ചോർച്ച ഉണ്ടായതിനെക്കുറിച്ച് പരിസ്ഥിതി മന്ത്രാലയം അന്വേഷണം ആരംഭിച്ചു. കടൽത്തീരത്താണ് എണ്ണ ചോർച്ച കണ്ടെത്തിയത്. നാട്ടുകാരുടെ സഹകരണത്തോടെ പ്രദേശം ഉടനടി വൃത്തിയാക്കിയതായി അധികൃതർ അറിയിച്ചു.

പഞ്ച നക്ഷത്ര ഹോട്ടലുള്ള അൽ അഖ ബീച്ചിനു സമീപമായിരുന്നു എണ്ണ പരന്നത് കണ്ടെത്തിയത്. സന്ദർശകർക്കും അതിഥികൾക്കും നീന്തൽ വിലക്കിയിരുന്നു.ഇപ്പോൾ സുരക്ഷിതമാണെന്നും അധികൃതർ അറിയിച്ചു.

“ഇനിയും എണ്ണ പുരണ്ട ചില സ്ഥലങ്ങളുണ്ട്. പക്ഷേ പൊതുവേ, ബീച്ചിലേക്ക് പോകുന്നതും നീന്തൽ ആസ്വദിക്കുന്നതും സുരക്ഷിതമാണ്.’ ഒരു ഹോട്ടൽ പ്രതിനിധി പറഞ്ഞു.ഫുജൈറ പരിസ്ഥിതി അതോറിറ്റി ബീച്ചിന്റെ ചിത്രങ്ങൾ സമൂഹ മാധ്യമങ്ങളിൽ പങ്കിട്ടു. ആദ്യ ഫോട്ടോയിൽ, ബീച്ചിലെ മണൽ തിരമാലകളുടെ അടയാളങ്ങൾ പോലെ എണ്ണയുടെ വരകൾ കാണപ്പെടുന്നു.

വൃത്തിയാക്കിയ ശേഷം, അടയാളങ്ങളൊന്നും ദൃശ്യമായില്ല. പ്രദേശത്തെ ഹോട്ടലുകൾ എണ്ണ ചോർച്ച റിപ്പോർട്ട് ചെയ്തയുടനെ, പരിസ്ഥിതി അതോറിറ്റിയിൽ നിന്നുള്ള ഒരു സംഘം സ്ഥലത്തേക്ക് കുതിച്ചു. വിദഗ്ധരായ കമ്പനികൾ, ബാധിത ഹോട്ടലുകൾ, മറ്റ് സ്ഥാപനങ്ങൾ എന്നിവയുമായി ഏകോപിപ്പിച്ച്, സ്ഥിതിഗതികൾ നിയന്ത്രിക്കാൻ അതോറിറ്റിക്ക് കഴിഞ്ഞു. ചോർച്ചയുടെ കാരണം കണ്ടെത്താൻ അന്വേഷണം നടക്കുകയാണെന്ന് അതോറിറ്റി അറിയിച്ചു.

ഉത്തരവാദികളായവർക്കെതിരെ നിയമനടപടി സ്വീകരിക്കുമെന്നും എമിറേറ്റിന്റെ പ്രകൃതിവിഭവങ്ങളെ നശിപ്പിക്കുന്നവരോട് ഒരു ദയയും ഉണ്ടാകില്ലെന്നും അവർ കൂട്ടിച്ചേർത്തു.
2022ലാണ് രാജ്യത്ത് അവസാനമായി ഇത്തരമൊരു സംഭവം റിപ്പോർട്ട് ചെയ്തത്. ഷാർജയിലും ഫുജൈറയിലും കൽബയിലും എണ്ണ ചോർച്ച ബാധിച്ചതിനെ തുടർന്ന് ചില ബീച്ചുകൾ താത്കാലികമായി അടച്ചിരുന്നു.