എടവണ്ണ ആമസോണ്‍ വ്യൂ പോയിന്റില്‍ നിന്നും താഴേക്ക് വീണ് ഒരാള്‍ മരിച്ചു

മലപ്പുറം | എടവണ്ണ ചാത്തല്ലൂര്‍ ആമസോണ്‍ വ്യൂ പോയിന്റിലേക്ക് കയറിയ രണ്ടു യുവാക്കള്‍ താഴേക്ക് വീണു. ഒരാള്‍ മരിച്ചു. ഒരാള്‍ക്ക് ഗുരുതര പരിക്ക്.

മലപ്പുറം ചട്ടിപ്പറമ്പ് സ്വദേശി റഹ്മാന്‍ (19) ആണ് മരിച്ചത്. കൂടെയുണ്ടായിരുന്ന നിലമ്പൂര്‍ സ്വദേശി അക്ഷയെ ഗുരുതര പരിക്കുകളോടെ മഞ്ചേരി മെഡിക്കല്‍ കോളേജിലേക്ക് മാറ്റി. കൊളപ്പട് ബ്രാണോടി വഴി ആമസോണ്‍ പോയിന്റിലേക്ക് പോകുന്ന വഴിയില്‍ എലാംകുളം മല ഭാഗത്താണ് അപകടം. ഈയിടെ എടവണ്ണ പഞ്ചായത്തിലെ ചോലാര്‍ മലനിരക്കു സമീപത്തുള്ള ആമസോണ്‍ വ്യൂ പോയിന്റ് സോഷ്യല്‍ മീഡിയയിലൂടെ ഏറെ പ്രശസ്തമായത്.

രണ്ട് വ്യൂ പോയിന്റ് നിന്നായി ചാലിയാര്‍ പുഴയുടെ ദീര്‍ഘവീക്ഷണം ലഭ്യമാകുന്നു എന്നതും നല്ല കാറ്റും രാവിലെയും വൈകുന്നേരവും ഉള്ള കോട മഞ്ഞും ആണ് സഞ്ചാരികളെ ഇങ്ങോട്ട് ആകര്‍ഷിക്കുന്നത്. സമൂഹമാധ്യമങ്ങളിലൂടെ ഒട്ടേറെ വീഡിയോകളും ഫോട്ടോകളും പ്രചരിച്ചത് വഴി മലപ്പുറം ജില്ലയ്ക്ക് പുറമെ മറ്റു ജില്ലകളില്‍ നിന്നു പോലും അനവധിപേര്‍ ഇങ്ങോട്ട് എത്താറുണ്ട്.

ഇവിടെ വരുന്ന സന്ദര്‍ശകര്‍ക്കു പ്രത്യേകിച്ച് മുന്നറിയിപ്പ് ബോര്‍ഡുകളോ, പാറകള്‍ക്ക് സമീപം അതിര്‍ത്തി വേലികളോ ബാരിക്കേഡുകളോ ഒന്നും തന്നെ നിലവില്‍ സ്ഥാപിച്ചിട്ടില്ല.