ഒ ആര്‍ കേളു ഇനി പട്ടികജാതി പട്ടികവര്‍ഗ ക്ഷേമ വകുപ്പ് മന്ത്രി; സത്യപ്രതിജ്ഞ ചെയ്തു

തിരുവനന്തപുരം | സംസ്ഥാനത്തെ പുതിയ മന്ത്രിയായി വയനാട്ടില്‍ നിന്നുള്ള എല്‍ ഡി എഫ് എം എല്‍ എ. ഒ ആര്‍ കേളു സത്യപ്രതിജ്ഞ ചെയ്ത് അധികാരമേറ്റു. രാജ്ഭവനില്‍ നടന്ന ചടങ്ങില്‍ സംസ്ഥാന ഗവര്‍ണര്‍ ആരിഫ് മുഹമ്മദ് ഖാന്‍ സത്യവാചകം ചൊല്ലിക്കൊടുത്തു. മുഖ്യമന്ത്രി പിണറായി വിജയന്‍ സന്നിഹിതനായിരുന്നു.

പട്ടികജാതി പട്ടികവര്‍ഗ ക്ഷേമവകുപ്പ് മന്ത്രിയായാണ് കേളു ചുമതലയേറ്റത്. ലോക്‌സഭയിലേക്ക് തിരഞ്ഞെടുക്കപ്പെട്ട കെ രാധാകൃഷ്ണന്‍ മന്ത്രിസ്ഥാനം രാജിവെച്ചതോടെയാണ് രണ്ടാം പിണറായി മന്ത്രിസഭയില്‍ ഒ ആര്‍ കേളു മന്ത്രിയായത്. വയനാട്ടില്‍ നിന്നുള്ള 200 പേര്‍ ഉള്‍പ്പെടെ 500ഓളം പേര്‍ ചടങ്ങില്‍ സംബന്ധിച്ചു.

വയനാട്ടില്‍ നിന്നുള്ള സി പി എമ്മിന്റെ ആദ്യ മന്ത്രിയാണ് ഒ ആര്‍ കേളു. മാനന്തവാടി മണ്ഡലത്തില്‍ നിന്നാണ് അദ്ദേഹം എം എല്‍ എയായി തിരഞ്ഞെടുക്കപ്പെട്ടത്. വയനാട് ജില്ലയ്ക്ക് ആദ്യമായാണ് പിണറായി മന്ത്രിസഭയില്‍ പ്രാതിനിധ്യം ലഭിക്കുന്നത്. യു ഡി എഫ് സര്‍ക്കാറില്‍ മന്ത്രിയായിരുന്ന കോണ്‍ഗ്രസ്സിലെ പി കെ ജയലക്ഷ്മിക്കു ശേഷം ആദിവാസി വിഭാഗത്തില്‍നിന്നു സംസ്ഥാന മന്ത്രിസഭയിലേക്കെത്തുന്ന ജനപ്രതിനിധി കൂടിയാണ് കേളു. രാധാകൃഷ്ണന്‍ കൈകാര്യം ചെയ്തിരുന്ന ദേവസ്വം വകുപ്പ് വി എന്‍ വാസവനും പാര്‍ലിമെന്ററി കാര്യം എം ബി രാജേഷിനുമാണ് നല്‍കിയത്.