ഒസ്യത്ത്

സൗഹൃദമില്ലാത്ത ജീവിതം
സാക്ഷിയില്ലാത്ത
മരണമാണെന്ന്
എല്‍ഡന്‍ ബെന്‍ഗെക്ക് പറയാം

ഹൃദ്യമല്ലാത്ത സൗഹൃദമാണ്
കെട്ടകാലത്തിന്റെ
കല്‍പ്പടവുകളില്‍ പൂപ്പലായി
കാണുന്നതിന്ന്

മതം ചികഞ്ഞു നോക്കിയിട്ട്
മരിച്ചവനു പോലും
മനം പുരട്ടിപ്പിക്കുന്ന ചിരിയുടെ
ഇമോജ് വിതറുന്ന കാലത്തെ
തകര്‍ത്തെറിഞ്ഞിട്ട് വേണമെനിക്ക്
ജോര്‍ജേട്ടന്റെ വീട്ടില്‍ നിന്നും
തേങ്ങാപൂള് വാങ്ങി

പാറുവേടത്തിന്റെ കുപ്പയില്‍ നിന്നൊത്തിരി
കാന്താരി മുളക് പറിച്ച്
അലവിക്കായുടെ വീട്ടില്‍ പോയി
അരിയും ഉപ്പും വാങ്ങി
കഞ്ഞിയുണ്ടാക്കി മതിയാവോളം
കുടിച്ചിട്ട് സൗഹൃദത്തിന്റെ
ഏമ്പക്കം വിട്ട് ഓര്‍മകളുടെ
വഴിത്താരയിലുടെ ഇറങ്ങി നടക്കാന്‍.