ഫോണ്‍ വിളിക്കും നെറ്റിനും ചിലവേറും; നിരക്ക് കൂട്ടി ജിയോയും എയര്‍ടെലും

രാജ്യത്ത് മൊബൈല്‍ ഫോണ്‍ വിളികള്‍ക്കും നെറ്റിനും ചിലവ് കുത്തനെ കൂടും. പ്രീ പെയ്ഡ്, പോസ്റ്റ് പെയ്ഡ് പ്ലാനുകളുടെ നിരക്ക് റിലയന്‍സും ജിയോയും എയര്‍ടെലും കുത്തനെ വര്‍ദ്ധിപ്പിച്ചു. ജിയോയുടെ പുതിയ നിരക്ക് ജൂലൈ മൂന്ന് മുതല്‍ പ്രാബല്യത്തില്‍ വരും. വോഡാഫോണ്‍- ഐഡിയ കമ്പനിയും നിരക്കു വര്‍ധന ഉടന്‍ പ്രഖ്യാപിച്ചേക്കും.

12.5 ശതമാനം മുതല്‍ 25 ശതമാനം വരെയാണ് ജിയോ വിവിധ പ്ലാനുകളില്‍ വര്‍ധനവ് വരുത്തിയത്. നേരത്തെ 155 രൂപയായിരുന്ന 28 ദിവസത്തെ 2 ജിബി ഡാറ്റ പ്ലാനിന് ഇനി മുതല്‍ 189 രൂപ നല്‍കേണ്ടി വരും. പ്രതിദിനം 1 ജിബി പ്ലാന്‍ തിരഞ്ഞെടുക്കുന്നവര്‍ക്ക് 209 രൂപയ്ക്ക് പകരം ഇനി 249 രൂപയും നല്‍കേണ്ടി വരും.

പ്രതിദിനം 1.5 ജിബി ഡാറ്റ ലഭിക്കുന്ന 239 രൂപയുടെ പ്ലാന്‍ 299 രൂപ ആകും. 2 ജിബിക്ക് ഇനി മുതല്‍ 299 രൂപയായിരിക്കില്ല. 349 രൂപയായിരിക്കും നല്‍കേണ്ടി വരിക. പ്രതിദിനം 2.5 ജിബി ഡാറ്റ 349 രൂപക്ക് നല്‍കിയ പ്ലാന്‍ ഇനി 399 രൂപയായി മാറും. 3 ജിബി ഡാറ്റ പ്ലാനിനു ഇനി 399 രൂപയ്ക്ക് പകരം 449 രൂപയും നല്‍കണം.

എയര്‍ടെല്‍ 20 ശതമാനത്തോളം ആണ് നിരക്ക് വര്‍ദ്ധിപ്പിച്ചത്. ഇതും ജൂലൈ 3 മുതല്‍ പ്രാബല്യത്തില്‍ വരുമെന്നാണ് അറിയിച്ചിരിക്കുന്നത്. 179 രൂപയുടെ പാക്കിന് ഇനിമുതല്‍ 199 രൂപ നല്‍കണം. 28 ദിവസം 1 ജിബി ദിവസവും നല്‍കുന്ന 265 രൂപയുടെ പാക്കിന് 34 രൂപ വര്‍ദ്ധിപ്പിച്ചു. ഇനിമുതല്‍ 299 രൂപ നല്‍കണം. 299 ന്റെ ഒന്നര ജിബി ദിവസവും ലഭിക്കുന്ന പാക്കിന് 349 രൂപയാണ് പുതിയ നിരക്ക്.