സാമൂഹിക വിരുദ്ധര്‍ക്കെതിരായ പോലീസ് നടപടി; സംസ്ഥാനത്ത് ഇതുവരെ അറസ്റ്റിലായത് 13,032 ഗുണ്ടകള്‍

തിരുവനന്തപുരം | സാമൂഹിക വിരുദ്ധര്‍ക്കെതിരായ പോലീസ് നടപടിയുടെ ഭാഗമായി സംസ്ഥാനത്ത് ഇതുവരെ അറസ്റ്റിലായത് 13,032 ഗുണ്ടകള്‍. ഡിസംബര്‍ 18 മുതല്‍ ജനുവരി ഒമ്പത് വരെയുള്ള കണക്കാണിത്. ഗുണ്ടാ നിയമപ്രകാരം ഇവരില്‍ 215 പേര്‍ക്കെതിരെ കേസെടുത്തതായും പോലീസ് അറിയിച്ചു. ഇക്കാലയളവില്‍ പോലീസ് സംസ്ഥാന വ്യാപകമായി 16,680 സ്ഥലങ്ങളില്‍ റെയ്ഡ് നടത്തി. 5,987 മൊബൈല്‍ ഫോണുകള്‍ പിടിച്ചെടുത്തു. ജാമ്യവ്യവസ്ഥകള്‍ ലംഘിച്ച 61 പേരുടെ ജാമ്യം റദ്ദാക്കാന്‍ നടപടി സ്വീകരിച്ചു.

ഏറ്റവും കൂടുതല്‍ ഗുണ്ടകള്‍ അറസ്റ്റിലായത് തിരുവനന്തപുരം റൂറലിലാണ് – 1,506 പേര്‍. ആലപ്പുഴയില്‍ 1,322 പേരും കൊല്ലം സിറ്റിയില്‍ 1,054 പേരും പാലക്കാട് 1,023 പേരും കാസര്‍ക്കോട്ട് 1,020 പേരും പിടിയിലായി. ഏറ്റവും കൂടുതല്‍ മൊബൈല്‍ ഫോണുകള്‍ പിടിച്ചെടുത്തതും തിരുവനന്തപുരം റൂറലില്‍ നിന്നാണ്. 1,103 എണ്ണം.