പോത്തന്‍കോട് കൊലപാതകം; പോലീസ് പ്രാഥമിക പ്രതിപ്പട്ടിക തയ്യാറാക്കി

തിരുവനന്തപുരം | പോത്തന്‍കോട് ഗുണ്ടാ കുടിപ്പകയെ തുടര്‍ന്നുള്ള കൊലപാതകത്തില്‍ പോലീസ് പ്രാഥമിക പ്രതിപ്പട്ടിക തയ്യാറാക്കി. സുധീഷ് ഉണ്ണിയാണ് കേസിലെ ഒന്നാം പ്രതി. രണ്ടാം പ്രതി ഒട്ടകം രാജഷും മൂന്നാം പ്രതി ശ്യാമുമാണ്. ശ്യാം കൊല്ലപ്പെട്ട സുധീഷിന്റെ ഭാര്യാ സഹോദരനാണ്. ഇയാളാണ് സുധീഷിന്റെ ഒളിത്താവളം ഗുണ്ടാ സംഘത്തിന് ചോര്‍ത്തി നല്‍കിയത്.കഞ്ചാവ് വില്‍പനയെ ചൊല്ലിയുള്ള തര്‍ക്കത്തില്‍ സുധീഷ് ശ്യാമിനെ മര്‍ദ്ദിച്ചിരുന്നു.

ഒന്നാം പ്രതി സുധീഷ് ഉണ്ണിയുടെ അമ്മക്ക് നേരെ ബോംബെറിഞ്ഞതിലുള്ള വൈരാഗ്യമാണ് കൊലപാതകം ആസൂത്രണം ചെയ്യാന്‍ കാരണം. ആറ്റിങ്ങല്‍ മങ്കാട്ടുമൂലയില്‍ നടന്ന രണ്ട് അക്രമ സംഭവങ്ങളുടെ തുടര്‍ച്ചയാണ് കല്ലൂരിലെ കൊലപാതകം. അക്രമികളെ സംഘടിപ്പിച്ചതും,കൊലപാതകം ആസൂത്രണം ചെയ്തതും കുപ്രസിദ്ധ ഗുണ്ട ഒട്ടകം രാജേഷാണ്.

കഴിഞ്ഞ ദിവസമാണ് പോത്തന്‍കോട് സ്വദേശി സുധീഷ് (35) കൊല്ലപ്പെട്ടത്. സുധീഷിന്റെ കാല്‍ വെട്ടിയെടുത്ത ശേഷം ബൈക്കില്‍ എടുത്തു കൊണ്ടുപോയി റോഡിലേക്ക് വലിച്ചെറിയുകയായിരുന്നു. അക്രമി സംഘം ബൈക്കിലെത്തിയായിരുന്നു സുധീഷിനെ ആക്രമിച്ചത്. ഓടി വീട്ടില്‍ കയറിയ സുധീഷിനെ പിന്തുടര്‍ന്ന് ആക്രമിക്കുകയായിരുന്നു