ആസിയാൻ ഉച്ചകോടിയിൽ പങ്കെടുക്കാൻ പ്രധാനമന്ത്രി നരേന്ദ്ര മോദി ഇന്തോനേഷ്യയിലേക്ക് തിരിച്ചു

ന്യൂഡൽഹി | ഇരുപതാമത് ആസിയാൻ-ഇന്ത്യ ഉച്ചകോടിയിലും 18-ാമത് കിഴക്കൻ ഏഷ്യ ഉച്ചകോടിയിലും പങ്കെടുക്കുന്നതിനായി പ്രധാനമന്ത്രി നരേന്ദ്ര മോദി ഇന്തോനേഷ്യയിലേക്ക് തിരിച്ചു. വ്യാഴാഴ്ച പുലർച്ചെ മൂന്ന് മണിയോടെ അദ്ദേഹം ഇന്തോനേഷ്യയിലെത്തും. വ്യാഴാഴ്ചയും വെള്ളിയാഴ്ചയുമാണ് ഉച്ചകോടി.

ആസിയാന്റെ നിലവിലെ ചെയർമാനായ ഇന്തോനേഷ്യയാണ് രണ്ട് ഉച്ചകോടികൾക്കും ജക്കാർത്തയിൽ ആതിഥേയത്വം വഹിക്കുന്നത്. ‘ആസിയാൻ കാര്യങ്ങൾ: വികസനത്തിന്റെ പ്രഭവകേന്ദ്രം’ എന്നതാണ് ഈ വർഷത്തെ ഉച്ചകോടിയുടെ പ്രമേയം.

കഴിഞ്ഞ വർഷം ഇന്ത്യ-ആസിയാൻ ബന്ധം സമഗ്ര തന്ത്രപരമായ പങ്കാളിത്തത്തിലേക്ക് ഉയർത്തിയതിന് ശേഷമുള്ള ആദ്യ ഉച്ചകോടിയാണ് ഇരുപതാമത് ആസിയാൻ-ഇന്ത്യ ഉച്ചകോടിയെന്ന് വിദേശകാര്യ മന്ത്രാലയം സെക്രട്ടറി സൗരഭ് കുമാർ ഇന്നലെ വൈകുന്നേരം ന്യൂഡൽഹിയിൽ മാധ്യമപ്രവർത്തകരോട് പറഞ്ഞു.

ഉച്ചകോടിയിൽ പ്രധാനമന്ത്രി ആസിയാൻ -ഇന്ത്യ ബന്ധത്തിലെ പുരോഗതി അവലോകനം ചെയ്യുകയും അതിന് കൂടുതൽ ദിശാബോധം നൽകുകയും ചെയ്യുമെന്ന് അദ്ദേഹം പറഞ്ഞു. ആസിയാൻ രാജ്യങ്ങളുമായുള്ള ഇന്ത്യയുടെ ബന്ധം വടക്കുകിഴക്കൻ നയത്തിന്റെയും വിശാലമായ ഇന്തോ-പസഫിക് മേഖലയെക്കുറിച്ചുള്ള ഇന്ത്യയുടെ കാഴ്ചപ്പാടിന്റെയും കേന്ദ്ര സ്തംഭമാണെന്നും ശ്രീ കുമാർ പറഞ്ഞു.