പ്രൈം വോളിബോൾ ലീഗ്; കേരള ഡർബിക്ക് ഇനി മണിക്കൂറുകൾ

കൊച്ചി | പ്രൈം വോളിബോൾ ലീഗ് രണ്ടാം സീസണിലെ കേരള ഡർബിക്ക് ഇനി മണിക്കൂറുകൾ. ഇന്ന് വൈകിട്ട് ഏഴിന് കൊച്ചിയിലാണ് മത്സരം.

കാത്തിരിപ്പിന് വിരാമമിട്ട് കേരള ടീമുകളായ കാലിക്കറ്റ് ഹീറോസും കൊച്ചി ബ്ലൂ സ്പൈക്കേഴ്സും കൊന്പുകോർക്കുന്പോൾ കൊച്ചി റീജ്യനൽ സ്പോർട്സ് സെന്ററിലെ കാണിക്കൂട്ടത്തിന് ആവേശം ഇരട്ടിക്കുമെന്നുറപ്പ്.

ചെന്നൈ ബ്ലിറ്റ്സിനെ വീഴ്ത്തിയതിന്റെ ആത്മവിശ്വാസത്തിലാണ് കാലിക്കറ്റ് ഇറങ്ങുക. അതേസമയം, സീസണിൽ ഒരു ജയം പോലും നേടാനാകാത്ത കൊച്ചിക്ക് ഇനിയുള്ള എല്ലാ മത്സരങ്ങളും നിർണായകമാണ്.

“ജയം, തോൽവി എന്നതിലുപരി വോളി പ്രേമികൾക്ക് എന്നത്തേക്കുമായി നല്ലൊരു മത്സരം നൽകാനാണ് ഞങ്ങൾ ആഗ്രഹിക്കുന്നതെന്ന് കാലിക്കറ്റ് ഹീറോസ് യൂനിവേഴ്സൽ ജെറോം വിനീത് പറഞ്ഞു.

ഏറെ കാലമായി അവർ ഈ മത്സരത്തിനായി കാത്തിരിക്കുകയാണ്. ഞങ്ങൾക്ക് സമ്മർദമില്ല. ഞങ്ങൾ നല്ല നിലയിലാണുള്ളത്. കളികാണാൻ ഏറെ വോളി പ്രേമികൾ എത്തുമെന്ന് ഞങ്ങൾക്കറിയാം. അവർ കൂടുതൽ ഊർജം നൽകും. ഇത്തരം മത്സരങ്ങളാണ് കളിക്കാൻ ആഗ്രഹിക്കുന്നത്- വിനീത് കൂട്ടിച്ചേർത്തു.

അതേസമയം, സ്വന്തം കാണികൾക്ക് മുന്നിൽ വിജയമാണ് ലക്ഷ്യമെന്ന് കൊച്ചി ബ്ലൂ സ്‌പൈക്കേഴ്‌സ് ക്യാപ്റ്റൻ വിപുൽ കുമാർ പറഞ്ഞു.