നിരത്ത്‌ കീഴടക്കാൻ പൾസർ എൻ 125

ബജാജ് അതിൻ്റെ ഏറ്റവം പുതിയ മോഡൽ മോട്ടോർ സൈക്കിൾ പുറത്തിറക്കി. സൂപ്പർഹിറ്റായ പൾസർ സീരീസിൽ എൻ 125 ആണ്‌ പുറത്തിറക്കിയത്‌. 12 എച്ച്‌പി പവറും 11 എൻഎം പരമാവധി ടോർക്കും പുറപ്പെടുവിക്കുന്ന 124.58 സിസി, എയർ കൂൾഡ് എൻജിനാണ് പൾസർ എൻ125ന് കരുത്തേകുന്നത്. ഇത് 5-സ്പീഡ് ഗിയർബോക്സുമായി ജോടിയാക്കിയിരിക്കുന്നു. 9.5 ലിറ്ററാണ് ഇന്ധന ടാങ്കിൻ്റെ ശേഷി. മുൻവശത്ത് ടെലിസ്‌കോപ്പിക് ഫോർക്കും പിന്നിൽ മോണോഷോക്കും ലഭിക്കുന്നു. 240 എംഎം ഡിസ്‌ക് ബ്രേക്കിൽ നിന്നും 130 എംഎം റിയർ ഡ്രം ബ്രേക്കിൽ നിന്നുമാണ് സ്റ്റോപ്പിംഗ് പവർ വരുന്നത്.

രണ്ട് വേരിയൻ്റുകളിൽ ബൈക്ക്‌ ലഭ്യമാണ്. എൽഇഡി ഡിസ്ക് വേരിയൻ്റിന് 94,707 രൂപയും LED ഡിസ്ക് ബിടി വേരിയൻ്റിന് 98,707 രൂപയുമാണ് ആണ്‌ എക്‌സ് ഷോറൂം വിലകൾ. അടിസ്ഥാന സ്‌പെക് പൾസർ N125-ൽ എൽഇഡി ഹെഡ്‌ലാമ്പുകളും ഡിസ്‌ക് ബ്രേക്കുകളും സ്റ്റാൻഡേർഡായി സജ്ജീകരിച്ചിരിക്കുന്നു. ഓപ്ഷണൽ കിക്ക് സ്റ്റാർട്ടറിനൊപ്പം സെൽഫ് സ്റ്റാർട്ടറും ലഭിക്കുന്നു.

80/100 R17 ഫ്രണ്ട്, 100/90 R17 പിൻ യൂണിറ്റ് എന്നിവയാണ് ടയർ ഡ്യൂട്ടി ചെയ്യുന്നത്. എബോണി ബ്ലാക്ക്, കോക്ടെയ്ൽ വൈൻ റെഡ്, പേൾ മെറ്റാലിക് വൈറ്റ്, കരീബിയൻ ബ്ലൂ എന്നിവയാണ് കളർ ഓപ്ഷനുകൾ.

ബേസ്‌ മോഡലിനേക്കാൾ 4,000 രൂപ അധികം നൽകിയാൽ LED ഡിസ്ക് BT വേരിയൻ്റ് ലഭിക്കും. പേരിൽ നിന്ന് വ്യക്തമാകുന്നത് പോലെ, ഈ വേരിയൻ്റിന് കോൾ, മെസേജ് അലേർട്ടുകൾക്കൊപ്പം ബ്ലൂടൂത്ത് കണക്റ്റിവിറ്റി ലഭിക്കുന്നു. ഇതിന് ISG (ഇൻ്റഗ്രേറ്റഡ് സ്റ്റാർട്ടർ ജനറേറ്റർ) സംവിധാനവും നൽകിയിട്ടുണ്ട്‌. ട്രാഫിക്കിൽ ബൈക്ക്‌ ഓട്ടോമാറ്റിക്കായി ഓഫാവുകയും ക്ലച്ച്‌ അമർത്തിയാൽ സ്റ്റാർട്ട്‌ ആകുകയും ചെയ്യുന്നതാണിത്‌.