നിലയ്ക്കല്‍ ബേസ് ക്യാമ്പിലെ പമ്പും മോട്ടോറുകളും മോഷ്ടിച്ച് കടത്തി: മൂന്നു യുവാക്കള്‍ അറസ്റ്റില്‍

പത്തനംതിട്ട| പമ്പ നിലക്കല്‍ ബേസ് ക്യാമ്പിനോട് ചേര്‍ന്നുള്ള മാലിന്യസംസ്‌കരണ പ്ലാന്റിന്റെ ഇന്‍സിനേറ്റര്‍ പ്രവര്‍ത്തിപ്പിക്കുന്നതിന് ഉപയോഗിക്കുന്ന എഫ് ഡി ഫാനിന്റെ 3 എച്ച് പി യുടെ 2 മോട്ടോറും ഡീസല്‍ പമ്പ് ചെയ്യുന്നതിനുള്ള ഒന്നര എച്ച് പി യുടെ പമ്പും മോഷ്ടിച്ച കേസില്‍ മൂന്നു യുവാക്കള്‍ അറസ്റ്റില്‍.

റാന്നി പെരുനാട് പമ്പാ ത്രിവേണി അട്ടത്തോട് പടിഞ്ഞാറേ കോളനി ഓലിക്കല്‍ വീട്ടില്‍ രജീഷ്(18), കൊന്നമൂട്ടില്‍ വീട്ടില്‍ കണ്ണന്‍ എന്ന് വിളിക്കുന്ന മഹേഷ് ( 24), കൊന്നമൂട്ടില്‍ വീട്ടില്‍ മനു ( 23) എന്നിവരാണ് പമ്പ പോലീസിന്റെ പിടിയിലായത്.

കഴിഞ്ഞ മാസം ആറിനാണ് പ്രതികള്‍ സാധനങ്ങള്‍ മോഷ്ടിച്ചു കടത്തിയത്. ദേവസ്വം ബോര്‍ഡ് അസിസ്റ്റന്റ് എന്‍ജിനീയറുടെ പരാതിപ്രകാരം രജിസ്റ്റര്‍ ചെയ്ത കേസിലാണ് അറസ്റ്റ്. ജില്ലാ പോലീസ് മേധാവി വി അജിത്തിന്റെ നിര്‍ദേശപ്രകാരം ഊര്‍ജ്ജിതമാക്കിയ അന്വേഷണത്തിലാണ് പ്രതികള്‍ അറസ്റ്റിലായിരിക്കുന്നത്.