'വിദ്യാര്‍ഥി സംഘടനാ കാലത്തെ തങ്ങളുടെ നേതാവാണ്'; ജി സുധാകരനെ വീട്ടില്‍ സന്ദര്‍ശിച്ച് പി ജയരാജന്‍

ആലപ്പുഴ | മുതിര്‍ന്ന സിപിഎം നേതാവും മുന്‍ മന്ത്രിയുമായ ജി സുധാകരനെ വീട്ടിലെത്തി സന്ദര്‍ശിച്ച് സംസ്ഥാന കമ്മിറ്റി അംഗം പി ജയരാജന്‍. ആലപ്പുഴ പറവൂരിലെ വീട്ടിലാണ് പി ജയരാജന്‍ എത്തിയത്. ജി സുധാകരന്റെ സഹോദരനും എസ്എഫ്‌ഐ നേതാവുമായിരുന്ന ജി ഭുവനേശ്വരന്റെ രക്തസാക്ഷിത്വ അനുസ്മരണ ദിനത്തില്‍ പങ്കെടുക്കാനെത്തിയതായിരുന്നു ജയരാജന്‍.’സുധാകരനെ പാര്‍ട്ടി പരിപാടികളില്‍ നിന്ന് അകറ്റിനിര്‍ത്തുന്നു എന്ന വിമര്‍ശനം നിലനില്‍ക്കുമ്പോഴാണു കൂടിക്കാഴ്ചയെന്നത് ശ്രദ്ധേയമാണ്

വിദ്യാര്‍ഥി സംഘടന കാലഘട്ടത്തിലെ തങ്ങളുടെ നേതാവായിരുന്നു ജി സുധാകരന്‍ എന്നും അന്നു മുതല്‍ അദ്ദേഹത്തോട് തികഞ്ഞ ആദരവാണെന്നും ജയരാജന്‍ മാധ്യമങ്ങളോട് പറഞ്ഞു. സുധാകരനെ നേരില്‍ കാണണമെന്ന് ആഗ്രഹമുണ്ടായിരുന്നു. ഭുവനേശ്വരന്റെ സഹോദരന്‍ എന്ന നിലയില്‍ കൂടി കുടുംബത്തെ കണ്ടു സ്‌നേഹാന്വേഷണം നടത്താന്‍ എത്തിയതാണെന്നും ജയരാജന്‍ പറഞ്ഞു.സുധാകരന്റെ വീട്ടില്‍ അരമണിക്കൂറോളം ചെലവഴിച്ച ശേഷമാണു ജയരാജന്‍ മടങ്ങിയത്. .