രാഹുല്‍, നിന്റെ സഹോദരിയായതില്‍ ഞാന്‍ അഭിമാനിക്കുന്നു; തിരിച്ചുവരവില്‍ രാഹുല്‍ ഗാന്ധിയെ പ്രശംസിച്ച് പ്രിയങ്ക ഗാന്ധി

ന്യൂഡല്‍ഹി | ലോക്‌സഭ തിരഞ്ഞെടുപ്പ് ഫലം വന്നതിന് തൊട്ടുപിന്നാലെ സഹോദരന്‍ രാഹുല്‍ ഗാന്ധിക്ക് പ്രശംസയുമായി കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി.എക്‌സിലൂടെയാണ് പ്രിയങ്ക ഗാന്ധി രാഹുല്‍ ഗാന്ധിയെ പ്രശംസിച്ചു കൊണ്ടുള്ള കുറിപ്പ് പങ്കുവെച്ചത്.

അവര്‍ നിന്നോട് എന്തൊക്കെ പറഞ്ഞപ്പോഴും ചെയ്തപ്പോഴും നീ ഉറച്ചുനിന്നു.പ്രതിസന്ധികളില്‍ നീ പിന്മാറിയില്ല. നിന്റെ ബോധ്യങ്ങളെ അവര്‍ ചോദ്യം ചെയ്തപ്പോള്‍ നീ അതിനെ മുറുകെ പിടിച്ചു. അവരുടെ നുണപ്രളയങ്ങള്‍ക്കിടയിലും നീ സത്യത്തിനായുള്ള പോരാട്ടം നിര്‍ത്തിയില്ല. അവര്‍ ഉയര്‍ത്തിയ ദേഷ്യവും വെറുപ്പും നിന്നെ ഒരിക്കലും കീഴടക്കിയില്ല.

ഹൃദയത്തിലെ സ്‌നേഹവും സത്യവും ദയയും കൊണ്ടാണ് നീ പോരാടിയത്. അന്നതൊന്നും കാണാത്തവര്‍ ഇന്നതൊക്കെ കാണുന്നു. പക്ഷെ നിന്നെ കണ്ടു കൊണ്ടിരിക്കുന്ന ഞങ്ങള്‍ക്കറിയാം നീ എത്ര ധീരനാണെന്ന്. രാഹുല്‍, നിന്റെ സഹോദരിയായതില്‍ ഞാന്‍ അഭിമാനിക്കുന്നുവെന്നും പ്രയങ്ക ഗാന്ധി എക്‌സിലൂടെ പറഞ്ഞു.

You kept standing, no matter what they said and did to you…you never backed down whatever the odds, never stopped believing however much they doubted your conviction, you never stopped fighting for the truth despite the overwhelming propaganda of lies they spread, and you never… pic.twitter.com/t8mnyjWnCh

— Priyanka Gandhi Vadra (@priyankagandhi) June 5, 2024

ലോക്‌സഭാ തെരഞ്ഞെടുപ്പില്‍ മികച്ച വിജയമാണ് ഇന്ത്യ മുന്നണിയും കോണ്‍ഗ്രസും നേടിയത്. 3.64 ലക്ഷം വോട്ടിന്റെ ഭൂരിപക്ഷത്തിലാണ് രാഹുല്‍ ഗാന്ധി വയനാട് സീറ്റ് നിലനിര്‍ത്തിയത്. റായ്ബറേലിയിലിയിലും 3.9 ലക്ഷം വോട്ടിന്റെ ഭൂരിപക്ഷത്തില്‍ രാഹുല്‍ ഗാന്ധി വിജയിച്ചു. രണ്ട് സീറ്റുകളില്‍ ഏതെങ്കിലുമൊന്ന് രാഹുലിന് ഒഴിയേണ്ടി വരുമെന്നതിനാല്‍ പ്രിയങ്ക ഉപതെരഞ്ഞെടുപ്പില്‍ മത്സരിച്ചേക്കുമെന്ന അഭ്യൂഹം ശക്തമാണ്. ഏത് സീറ്റ് നിലനിര്‍ത്തുമെന്ന് തീരുമാനിച്ചിട്ടില്ലെന്നും രാഹുല്‍ ഗാന്ധി കഴിഞ്ഞ ദിവസം പറഞ്ഞിരുന്നു.