Kerala
സംസ്ഥാനത്ത് എല്ലാ ജില്ലകളിലും മഴ മുന്നറിയിപ്പ്; ഇന്ന് മൂന്നു ജില്ലകളില് ഓറഞ്ച് അലര്ട്ട്
കേരള തീരത്തും, തമിഴ്നാട് തീരത്തും ചൊവ്വാഴ്ച രാത്രി 11.30 വരെ കള്ളക്കടല് പ്രതിഭാസത്തിനും, ഉയര്ന്ന തിരമാലയ്ക്കും സാധ്യതയുണ്ട്.
![](https://assets.sirajlive.com/2024/05/rain-897x538.jpg)
തിരുവനന്തപുരം | സംസ്ഥാനത്ത് എല്ലാ ജില്ലകളിലും ശക്തമായ മഴക്ക് സാധ്യതയെന്ന് കേന്ദ്രകാലാവസ്ഥ വകുപ്പ് . ചൊവ്വാഴ്ച തീവ്രമഴ കണക്കിലെടുത്ത് മൂന്നു ജില്ലകളില് ഓറഞ്ച് അലര്ട്ട് പ്രഖ്യാപിച്ചു. പത്തംതിട്ട,ഇടുക്കി ,കണ്ണൂര് ജില്ലകളിലാണ് ഇന്ന് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്.
അടുത്ത രണ്ടുദിവസം കൂടി സംസ്ഥാനത്ത് ശക്തമായ മഴ തുടരുമെന്നാണ് കാലാവസ്ഥ വകുപ്പിന്റെ മുന്നറിയിപ്പില് പറയുന്നത്. ബുധനാഴ്ച തീവ്രമഴ കണക്കിലെടുത്ത് കോഴിക്കോട്, കണ്ണൂര് ജില്ലകളില് ഓറഞ്ച് അലര്ട്ടാണ്. അതേസമയം എറണാകുളം,തൃശൂര്, പാലക്കാട്, മലപ്പുറം, കോഴിക്കോട് ,വയനാട് ജില്ലകളില് യെല്ലോ അലര്ട്ടാണ്.
കേരള തീരത്തും, തമിഴ്നാട് തീരത്തും ചൊവ്വാഴ്ച രാത്രി 11.30 വരെ കള്ളക്കടല് പ്രതിഭാസത്തിനും, ഉയര്ന്ന തിരമാലയ്ക്കും സാധ്യതയുണ്ട്.
കാസര്കോട്, കണ്ണൂര്, തിരുവനന്തപുരം ജില്ലകളിലെ തീരങ്ങളില് ചൊവ്വാഴ്ച രാത്രി 11.30 വരെ 2.9 മുതല് 3.4 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. ഇവിടങ്ങളിലെ തീരദേശവാസികളും മത്സ്യത്തൊഴിലാളികളും പ്രത്യേക ജാഗ്രത പാലിക്കണമെന്നും മുന്നറിയിപ്പില് പറയുന്നു.