സംസ്ഥാനത്ത് മഴക്കെടുതി രൂക്ഷമായി തുടരുന്നു; മധ്യകേരളത്തിലും വടക്കന്‍ ജില്ലകളിലും വ്യാപക നാശനഷ്ടം

തിരുവനന്തപുരം| സംസ്ഥാനത്ത് മഴക്കെടുതി തുടരുന്നു. വയനാട്, കണ്ണൂര്‍ ജില്ലകളില്‍ കാലാവസ്ഥ വകുപ്പ് ഇന്ന് ഓറഞ്ച് അലര്‍ട്ട് പ്രഖ്യാപിച്ചു. എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, കാസര്‍കോട് എന്നീ ജില്ലകളില്‍ മഞ്ഞ അലര്‍ട്ടും പ്രഖ്യാപിച്ചു. കനത്ത മഴയെതുടര്‍ന്ന് വയനാട്, പത്തനംതിട്ട, ഇടുക്കി, കോട്ടയം, എറണാകുളം, ആലപ്പുഴ ജില്ലകളിലും ഇരിട്ടി താലൂക്കിലും വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധിയാണ്.

ശക്തമായ മഴയെതുടര്‍ന്ന് മധ്യകേരളത്തിലും വടക്കന്‍ ജില്ലകളിലും വ്യാപകമായി നാശനഷ്ടങ്ങളാണ് റിപ്പോര്‍ട്ട് ചെയ്തിരിക്കുന്നത്. മലപ്പുറം ചെമ്പ്രശ്ശേരിയില്‍ മഴയില്‍ നെല്ലേങ്ങര സുരേഷിന്റെ വീട് പൂര്‍ണ്ണമായും തകര്‍ന്ന് വീണു. തലനാരിഴയ്ക്കാണ് വീട്ടുകാര്‍ രക്ഷപ്പെട്ടത്. അപകട സമയത്ത് വീടിനകത്തുണ്ടായിരുന്ന സുരേഷും, ഭാര്യയും പരുക്കേല്‍ക്കാതെ രക്ഷപ്പെട്ടു.

മലപ്പുറം കൊണ്ടോട്ടിയില്‍ ചേപ്പിലിക്കുന്ന് കുടുക്കില്‍ കൊയപ്പ രാജേഷിന്റെ വീടിന്റെ മുറ്റവും മതിലും ഇടിഞ്ഞ് വീണു. തറയ്ക്ക് വിള്ളലും ഉണ്ടായിട്ടുണ്ട്. രണ്ട് കുട്ടികള്‍ ഉള്‍പ്പടെ നാല് പേരാണ് വീട്ടില്‍ താമസിക്കുന്നത്.

കോഴിക്കോട് ഇടവിട്ട് മഴ തുടരുകയാണ്. കോഴിക്കോട് കനത്തമഴയില്‍ തൊട്ടില്‍പ്പാലത്ത് വലിയ പറമ്പത്ത് സക്കീനയുടെ വീട്ടിലെ കിണര്‍ ഇടിഞ്ഞ് താഴ്ന്നു. രണ്ട് ലക്ഷം രൂപയുടെ നഷ്ടമാണ് കണക്കാക്കുന്നത്. കോഴിക്കോട് ചക്കിട്ടപാറയില്‍ ഇന്നലെ ഉണ്ടായ ശക്തമായ മഴയില്‍ പറമ്പല്‍ വാളാംപൊയില്‍ ത്രേസ്യാമ്മയുടെ വീട് ഭാഗികമായി തകര്‍ന്നു. കിടപ്പ് രോഗിയാണ് ത്രേസ്യാമ്മ. മകനും കുടുംബവും ഒപ്പമുണ്ട്. വീട് പൂര്‍ണ്ണമായും അപകടാവസ്ഥയിലാണ്. തലനാരിഴക്കാണ് ഇവര്‍ പരുക്കേല്‍ക്കാത രക്ഷപ്പെട്ടത്. രണ്ട് ലക്ഷം രൂപയുടെ നഷ്ടമാണ് കണക്കാക്കുന്നത്. നാട്ടുകാര്‍ കുടുംബത്തെ മാറ്റിപ്പാര്‍പ്പിക്കാന്‍ നടപടി ആരംഭിച്ചു.

പയ്യാനക്കല്‍ ചാമുണ്ടി വളപ്പില്‍ ശക്തമായ കാറ്റില്‍ രണ്ട് വീടുകള്‍ ഭാഗികമായി തകര്‍ന്നു. കനത്ത മഴയില്‍ കോഴിക്കോട് കോട്ടൂളിയില്‍ സ്വകാര്യ വ്യക്തിയുടെ സ്ഥലത്തിന്റെ മതില്‍ ഇടിഞ്ഞു വീണു. ഇരുപത് മീറ്റര്‍ ഉയരത്തിലുള്ള കോണ്‍ഗ്രീറ്റ് മതില്‍ ആണ് തകര്‍ന്നത്. നിരവധി കുടുംബങ്ങള്‍ താമസിക്കുന്ന സ്ഥലത്താണ് അപകടം. അപകട സാധ്യത തുടരുന്നതിനാല്‍ എട്ട് കുടുംബങ്ങളെ സ്ഥലത്ത് നിന്നും ഒഴിപ്പിച്ചു.

കോട്ടയം കുമരകത്ത് ഇന്നലെ രാത്രിയിലുണ്ടായ കാറ്റില്‍ കൊല്ലകരി സ്വദേശി ഷാജി സി കെയുടെ വീടിന്റെ മേല്‍ക്കൂര പറന്നു പാടത്ത് പതിച്ചു. കാറ്റില്‍ റോഡിലൂടെ പോയ ഓട്ടോറിക്ഷ നിയന്ത്രണം വിട്ട് പാടത്തേക്ക് വീണു. നിരവധി ബൈക്കുകളും കാറ്റില്‍പെട്ടു.

കണ്ണൂര്‍ ജില്ലയിലെ മലയോര മേഖലയില്‍ രാത്രി മുതല്‍ കനത്ത മഴ തുടരുകയാണ്. പുഴകളില്‍ ജലനിരപ്പ് ഉയരുന്നുണ്ട്. മാട്ടറ, വയത്തൂര്‍ ചപ്പാത്തുകള്‍ വെള്ളത്തിനടിയിലാണ്. എടൂര്‍ പാലത്തിന്‍കടവ് റോഡിന്റെ ഒരു ഭാഗം ഇടിഞ്ഞു. ചെമ്പിലോട് വീടിന്റെ മേല്‍ക്കൂര തകര്‍ന്നു.

ഇടുക്കിയില്‍ മലയോര മേഖലയില്‍ ഉള്‍പ്പടെ മഴയുടെ ശക്തി കുറഞ്ഞു. എന്നാല്‍ വിനോദ സഞ്ചാര കേന്ദ്രങ്ങളില്‍ നിയന്ത്രണം തുടരുന്നു. കല്ലാര്‍ കുട്ടി ഡാമിന്റെ ഷട്ടറുകള്‍ 30 സെ.മീ കൂടി ഉയര്‍ത്തി. പമ്പാനദിയിലും മണിമലയാറ്റിലും ജലനിരപ്പ് ക്രമാതീതമായി ഉയര്‍ന്നതോടെ അപ്പര്‍ കുട്ടനാട് മേഖലയിലെ പല ഇടങ്ങളും വെള്ളത്തിലായി. തലവടി പഞ്ചായത്തിലെ നീരേറ്റുപുരം ഭാഗത്ത് നിരവധി വീടുകളില്‍ വെള്ളം കയറിയിട്ടുണ്ട്.

തിരുവല്ലയിലെ തിരുമൂലപുരം, ആറ്റുവാലി എന്നീ പ്രദേശങ്ങളിലെ വീടുകള്‍ക്കുള്ളില്‍ വെള്ളം കയറി. മണിമലയാറ്റില്‍ നിന്ന് വെള്ളം നേരിട്ട് കയറുന്ന പ്രദേശങ്ങളാണിത്. മലയോര മേഖലയിലേക്കുള്ള രാത്രിയാത്ര നിരോധനം ജില്ലയില്‍ തുടരുകയാണ്.

എറണാകുളം വരാപ്പുഴ മില്ലുപടിയില്‍ പഴയ കെട്ടിടത്തിന്റെ ഒരു ഭാഗം തകര്‍ന്നുവീണു. മുമ്പ് വ്യാപാര സ്ഥാപനങ്ങള്‍ പ്രവര്‍ത്തിച്ചിരുന്ന ഇവിടെ ആരും ഉണ്ടായിരുന്നില്ല. അബ്ദുള്‍ഖാദര്‍ എന്നയാളുടെ ഉടമസ്ഥതയിലുള്ളതാണ് കെട്ടിടം.

കനത്ത മഴയില്‍ വ്യാപകനാശ നഷ്ടം ഉണ്ടായതോടെ തീരമേഖലകളില്‍ പ്രതിഷേധം ശക്തമാവുകയാണ്. എറണാകുളം എടവനക്കാട് നാട്ടുകാര്‍ റോഡ് ഉപരോധിക്കുകയാണ്. തീരമേഖലയോടുള്ള സര്‍ക്കാര്‍ അവഗണനയില്‍ പ്രതിഷേധിച്ചാണ് വൈപ്പിന്‍ ചെറായി സംസ്ഥാന പാത ഉപരോധിക്കുന്നത്.