റമസാന്‍ വ്രതാനുഷ്ഠാനം; സമയ ദൈര്‍ഘ്യം ഏറ്റവും കൂടുതല്‍ സ്വീഡന്‍, നോര്‍വേ, ഫിന്‍ലന്‍ഡ് രാജ്യങ്ങളില്‍

ദമാം | ലോകമെമ്പാടുമുള്ള മുസ്‌ലിങ്ങള്‍ പുണ്യമാസമായ റമസാനിലേക്ക് പ്രവേശിച്ചതോടെ 2025 ലെ നോമ്പ് സമയം ഭൂമിശാസ്ത്രപരമായ സ്ഥാനം അനുസരിച്ച് ഗണ്യമായി വ്യത്യാസപ്പെടും, ചില രാജ്യങ്ങള്‍ 20 മണിക്കൂറില്‍ കൂടുതല്‍ നോമ്പ് ദൈര്‍ഘ്യം അനുഭവിക്കുമ്പോള്‍ മറ്റു ചില രാജ്യങ്ങളിലും നോമ്പിന്റെ ദൈര്‍ഘ്യത്തില്‍ കാര്യമായ വ്യത്യാസങ്ങളുണ്ട്.

അറബ് രാജ്യങ്ങളില്‍ ഏറ്റവും ദൈര്‍ഘ്യമേറിയ നോമ്പ് സമയം അള്‍ജീരിയ, ടുണീഷ്യ, മൊറോക്കോ എന്നിവിടങ്ങളിലാണ്. 14 മുതല്‍ 16 മണിക്കൂര്‍ വരെയാണ് ഇവിടങ്ങളില്‍ നോമ്പിന്റെ സമയം. 11 മണിക്കൂര്‍ മാത്രമുള്ള ചിലിയിലാണ് ഏറ്റവും കുറഞ്ഞ ഉപവാസ സമയം.

സ്‌കാന്‍ഡിനേവിയ പോലുള്ള ആര്‍ട്ടിക് പ്രദേശങ്ങളില്‍, നോമ്പ് സമയം ഈ വര്‍ഷം ഗണ്യമായി കൂടുതലായിരിക്കും. സ്വീഡന്‍, നോര്‍വേ, ഫിന്‍ലന്‍ഡ് തുടങ്ങിയ രാജ്യങ്ങളില്‍ 20 മണിക്കൂറില്‍ കൂടുതലായിരിക്കും നോമ്പ് സമയം. സ്വീഡനിലെ കിരുണയില്‍, സൂര്യന്‍ ചക്രവാളത്തിന് താഴെ കുറച്ച് മിനുട്ട് മാത്രമേ അസ്തമിക്കുന്നുള്ളൂ. ‘അര്‍ധരാത്രി സൂര്യന്‍’ എന്ന പ്രതിഭാസം കാരണം ഗ്രീന്‍ലന്‍ഡിന്റെ തലസ്ഥാനമായ നുക്കിലും 20 മണിക്കൂര്‍ വരെ നോമ്പിന് ദൈര്‍ഘ്യമുണ്ടാകും. ഇത് ആര്‍ട്ടിക് സര്‍ക്കിളിന് സമീപമുള്ള പ്രദേശങ്ങളില്‍ പകല്‍ വെളിച്ചം ദീര്‍ഘിപ്പിക്കും. ഐസ്ലന്‍ഡിന് ഏകദേശം 19 മണിക്കൂറും 59 മിനുട്ടുമാണ് ഉപവാസത്തിന്റെ ദൈര്‍ഘ്യം. ജി സി സി രാജ്യങ്ങള്‍ ഉള്‍പ്പെടുന്ന ഏഷ്യന്‍ രാജ്യങ്ങളില്‍ ഈ വര്‍ഷം 13 മണിക്കൂറാണ് നോമ്പിന്റെ ദൈര്‍ഘ്യം.

സഊദി അറേബ്യയില്‍ റമസാനിലെ ആദ്യ ദിവസം, ഏറ്റവും ദൈര്‍ഘ്യമേറിയ നോമ്പ് സമയം അഹാദ് അല്‍ മസാരിഹയിലായിരുന്നു (13 മണിക്കൂര്‍, 4 മിനുട്ട്). ഏറ്റവും കുറഞ്ഞ നോമ്പ് സമയം അല്‍ ഖുറയ്യത്ത് (12 മണിക്കൂര്‍, 54 മിനുട്ട്) പ്രദേശത്ത് രേഖപ്പെടുത്തി. റമസാന്‍ മാസത്തിന്റെ മധ്യത്തോടെ, വടക്കന്‍ പ്രവിശ്യയായ അറാറിലായിരിക്കും ഏറ്റവും ദൈര്‍ഘ്യമേറിയ നോമ്പ് (13 മണിക്കൂര്‍, 19 മിനുട്ട്). തെക്കന്‍ പ്രദേശമായ സബ്യയിലാണ് ഏറ്റവും കുറഞ്ഞ നോമ്പ് സമയം (12 മണിക്കൂര്‍, 15 മിനുട്ട്) ഉണ്ടാകുക. റമസാന്‍ അവസാനത്തോടെ തുറൈഫിലായിരിക്കും ഏറ്റവും ദൈര്‍ഘ്യമേറിയ നോമ്പ് സമയം (13 മണിക്കൂര്‍, 5 മിനുട്ട്). ഫറാസാന്‍ ദ്വീപുകളിലായിരിക്കും ഏറ്റവും കുറഞ്ഞ നോമ്പ് സമയം (12 മണിക്കൂര്‍, 29 മിനുട്ട്).

അടിസ്ഥാനപരമായി, ഉപവാസ സമയങ്ങളിലെ വ്യത്യാസം ഒരു പ്രദേശത്തുനിന്ന് മറ്റൊന്നിലേക്കുള്ള പകലിന്റെ ദൈര്‍ഘ്യത്തിലെ വ്യത്യാസമാണ്. ഭൂമധ്യരേഖയില്‍ നിന്നുള്ള ദൂരം, നിങ്ങള്‍ എവിടെയാണെന്നതിനെ ആശ്രയിച്ച് സൂര്യനെ കൂടുതല്‍ നീളമുള്ളതോ ചെറുതോ ആയി ദൃശ്യമാക്കുന്ന മറ്റ് ചില ശാസ്ത്രീയ കാര്യങ്ങള്‍ എന്നിവയുമായാണ് ബന്ധപ്പെട്ടിരിക്കുന്നത്. ഭൂമധ്യരേഖയ്ക്കും ധ്രുവങ്ങള്‍ക്കും ആപേക്ഷികമായി സ്ഥലങ്ങളുടെ സ്ഥാനം, വര്‍ഷത്തിലെ ഈ സമയത്ത് ചില പ്രദേശങ്ങളില്‍ പകല്‍ സമയം കൂടുതലാണ് എന്നിവയാണ് ഉപവാസ സമയത്തിലെ വ്യതിയാനങ്ങള്‍ക്ക് കാരണം.