ഇന്ത്യയും യു എ ഇയും തമ്മിൽ ഓപ്പൺ സ്‌കൈ പോളിസി വേണമെന്ന് റിപ്പോർട്ട്

ദുബൈ| ഇന്ത്യയും യു എ ഇയും തമ്മിലുള്ള ഒരു ഓപ്പൺ സ്‌കൈസ് കരാർ നിലവിൽ വരേണ്ട പ്രാധാന്യം ഊന്നിപ്പറഞ്ഞ് പുതിയ റിപ്പോർട്ട്. ഒബ്‌സർവർ റിസർച്ച് ഫൗണ്ടേഷനും ഇന്ത്യയിലെ യു എ ഇ എംബസിയും ചേർന്ന് പുറത്തിറക്കിയതാണ് റിപ്പോർട്ട്. പോളിസി നിലവിൽ വരുന്നതോടെ വിമാന നിരക്കുകൾ ഗണ്യമായി കുറയ്ക്കുമെന്നും അഞ്ച് വർഷത്തിനുള്ളിൽ ശേഷി ഇരട്ടിപ്പിക്കുന്നതിലൂടെ ഇന്ത്യൻ യാത്രക്കാർക്ക് 1.05 ബില്യൺ ഡോളറിലധികം ലാഭം നേടാമെന്നും റിപ്പോർട്ട് ഊന്നിപ്പറയുന്നു.

“കമ്പൈൻഡ് സ്‌കൈസ്: യു എ ഇ-ഇന്ത്യ വ്യോമയാന ഉദാരവൽക്കരണത്തിന്റെ പ്രയോജനങ്ങൾ ഇന്ത്യൻ യാത്രക്കാർക്കായി അൺലോക്ക് ചെയ്യുക’ എന്ന പുതിയ റിപ്പോർട്ട് ഇത് സംബന്ധമായ വിശദമായ സ്ഥിതിവിവരക്കണക്കുകൾ അവലോകനം ചെയ്തിട്ടുണ്ട്. 2014-2015 മുതൽ ദുബൈയ്ക്ക് 66,000ഉം അബൂദബിക്ക് 50,000ഉം സീറ്റുമാണ് അനുവദിച്ചത്. ഇത് ഇപ്പോഴും മാറ്റമില്ലാതെ തുടരുകയാണ്. എമിറേറ്റ്‌സ്, ഫ്ലൈ ദുബൈ, എയർ അറേബ്യ തുടങ്ങിയ യു എ ഇ വിമാനക്കമ്പനികൾ കൂടുതൽ സീറ്റുകൾ വേണമെന്ന് ആവശ്യപ്പെടുന്നു. യാത്രക്കാരുടെ എണ്ണത്തിൽ ഒരു ശതമാനം വർധനവ് നിരക്കുകളെ ഏകദേശം 0.2 ശതമാനം കുറക്കുമെന്നും ചെറുകിട, ഇന്ത്യൻ നഗരങ്ങൾക്ക് ഏറ്റവും കൂടുതൽ ഗുണം ലഭിക്കുമെന്നും റിപ്പോർട്ട് ചൂണ്ടിക്കാട്ടുന്നു.

വിമാന സേവനങ്ങൾ ഉദാരവത്കരിക്കുന്നത് നിരക്ക് ലാഭത്തിനപ്പുറം വ്യാപാരവും ടൂറിസവും വർധിപ്പിക്കും. സീറ്റ് ശേഷിയിൽ വർഷം തോറും അഞ്ച് ശതമാനം വർധനവ് 2028-ഓടെ 152 മില്യൺ ഡോളറിലധികം ഉപഭോക്തൃ അധികവരുമാനം സൃഷ്ടിക്കും. ശേഷി ഇരട്ടിപ്പിക്കുന്നത് ഇന്ത്യൻ ഉപഭോക്താക്കൾക്ക് 1.05 ബില്യൺ ഡോളറിലധികം സാമ്പത്തിക നേട്ടം നൽകും.
കോംപ്രിഹെൻസീവ് ഇക്കണോമിക് പാർട്ണർഷിപ്പ് അഗ്രിമെന്റ്(സെപ) പ്രകാരം യു എ ഇയുമായുള്ള വ്യാപാര ബന്ധം വളരുന്നുണ്ടെങ്കിലും ഓപ്പൺ സ്‌കൈ പോളിസി കരാറിൽ ഒപ്പിടാൻ ഇന്ത്യ മടിക്കുകയാണ്. 2012-ൽ കിംഗ്ഫിഷർ എയർലൈൻസ് പൂട്ടിയതും 2023-ൽ ഗോ ഫസ്റ്റ് പ്രവർത്തനം നിർത്തിയതും പോലുള്ള ഇന്ത്യൻ വ്യോമയാന മേഖലയിലെ സാമ്പത്തിക അസ്ഥിരതയും മറ്റു അന്താരാഷ്ട്ര വിമാനക്കമ്പനികളെ അപേക്ഷിച്ച് ഇന്ത്യൻ കാരിയറുകൾക്ക് മത്സരാധിഷ്ഠിത അന്താരാഷ്ട്ര ഹബ്ബുകൾ വികസിപ്പിക്കാനുള്ള വെല്ലുവിളിയും റിപ്പോർട്ട് എടുത്തുകാണിക്കുന്നു.
ഈ പ്രശ്‌നങ്ങൾ പരിഹരിക്കാൻ അഞ്ച് വർഷത്തിനുള്ളിൽ ശേഷി ഇരട്ടിപ്പിക്കുകയാണ് മാർഗമെന്ന് റിപ്പോർട്ട് നിർദേശിക്കുന്നു. ടയർ-2 നഗരങ്ങളിലേക്ക് യു എ ഇ എയർലൈനുകൾക്ക് പ്രവേശനം വിപുലീകരിക്കൽ, സുസ്ഥിര വ്യോമയാന രീതികൾക്കായി സംയുക്ത സംരംഭങ്ങൾ എന്നിവയും റിപ്പോർട്ട് ശുപാർശ ചെയ്യുന്നു.
2023-ൽ ഇരു രാജ്യങ്ങൾക്കിടയിലെ യാത്രക്കാരുടെ എണ്ണം 1.9 കോടിയായി. ഇന്ത്യയുടെ അന്താരാഷ്ട്ര വിമാന ഗതാഗതത്തിന്റെ 30 ശതമാനം വരുമിത്. യു എ ഇ കാരിയറുകൾ മറ്റ് വിപണികളിലേക്ക് ശ്രദ്ധ തിരിക്കുന്നത് ഒഴിവാക്കാൻ ഓപ്പൺ സ്‌കൈ പോളിസി ഇന്ത്യ വേഗത്തിൽ നടപടിയെടുത്തില്ലെങ്കിൽ നഷ്ടമായിരിക്കുമെന്ന് റിപ്പോർട്ട് മുന്നറിയിപ്പ് നൽകുന്നു.