എ ഐ വൈ എഫ് ജില്ലാ സമ്മേളനത്തിൽ എസ് എഫ് ഐക്കെതിരെ പ്രമേയം

കോട്ടയം | എം ജി സർവകലാശാല സെനറ്റ് തിരഞ്ഞെടുപ്പിൽ എ ഐ എസ് എഫ് പ്രവർത്തകർക്കെതിരെയുള്ള എസ് എഫ് ഐ ആക്രമണം ജനാധിപത്യ സമൂഹത്തിന് അപമാനമെന്ന് എ ഐ വൈ എഫ് പ്രമേയം. കോട്ടയം ജില്ലാ സമ്മേളനത്തിലാണ് എസ് എഫ് ഐക്കെതിരെ പ്രമേയം അവതരിപ്പിച്ചത്. ഉയർത്തിപ്പിടിക്കുന്ന മുദ്രാവാക്യത്തിന്റെ അന്തസത്ത മനസ്സിലാക്കാൻ കഴിയാത്ത ആൾക്കൂട്ടം മാത്രമായി എസ് എഫ് ഐ അധപതിച്ചതിന്റെ തെളിവാണ് എം ജി സർവകലാശാല തിരഞ്ഞെടുപ്പിന്റെ ഭാഗമായുണ്ടായത്.

മത്സരിക്കാനെത്തിയ എ ഐ എസ് എഫ് പ്രവർത്തകരെ മർദിക്കുകയും സംസ്ഥാന ജോ. സെക്രട്ടറി നിമിഷ രാജുവിനെ ജാതി പേര് വിളിച്ച് അപമാനിക്കുകയും കടന്നാക്രമിക്കുകയും ചെയ്ത സംഭവം ഏറെ അപമാനകരമാണ്.

അക്രമത്തെ തള്ളി പറയാതെ അക്രമകാരികളെ ന്യായീകരിക്കുകയാണ് എസ് എഫ് ഐ ചെയ്യുന്നതെന്നും പ്രമേയം കുറ്റപ്പെടുത്തി. ജില്ല ജോയിന്റ് സെക്രട്ടറി അഡ്വ. സുജിത്താണ് പ്രമേയം അവതരിപ്പിച്ചത്.