മെഗാ ഐപിഒക്ക് പിന്നാലെ യുഎഇയിൽ റീട്ടെയ്ൽ സാന്നിദ്ധ്യം വിപുപലമാക്കും: എം എ യൂസുഫലി

ദുബൈ | യുഎഇയിൽ 2024ലെ ഏറ്റവും വലിയ ഐപിഒ എന്ന റെക്കോർഡ് നേട്ടത്തിന് പിന്നാലെ ജിസിസിയിൽ റീട്ടെയ്ൽ സാന്നിദ്ധ്യം കൂടുതൽ വിപുലീകരിച്ച് ലുലു. മൂന്ന് വർഷത്തിനകം നൂറ് ഹൈപ്പർമാർക്കറ്റുകൾ എന്ന ഐപിഒ പ്രഖ്യാപനത്തിന്റെ ഭാഗമായി 16ആമത്തെ ഹൈപ്പർമാർക്കറ്റ് ദുബൈ മോട്ടോർ സിറ്റിയിൽ തുറന്നു. ദുബൈ മുനിസിപ്പാലിറ്റി ഡയറക്ടർ ദാവൂദ് അബ്ദുൽറഹ്മാൻ അൽഹജ്‌രി, ദുബൈ സെക്യൂരിറ്റി ഇൻഡസ്ട്രി ഏജൻസി ലൈസൻസിങ് വകുപ്പ് ഡയറക്ടർ മജീദ് ഇബ്രാഹിം അൽ സറൂണി എന്നിവർ ലുലു ഗ്രൂപ്പ് ചെയർമാൻ എം.എ യൂസുഫലിയുടെ സാന്നിദ്ധ്യത്തിൽ പുതിയ ലുലു ഹൈപ്പർമാർക്കറ്റിന്റെ ഉദ്ഘാടനം നിർവ്വഹിച്ചു.

ലുലു നിക്ഷേപകരുടെ വിശ്വാസത്തിന് കരുത്ത് പകരുന്നതാണ് ലുലുവിന്റെ വികസന പദ്ധതികളെന്ന് എം.എ യൂസുഫലി വ്യക്തമാക്കി. ദുബൈയിൽ ആറ് പുതിയ പദ്ധതികൾ ഉടൻ യാഥർത്ഥ്യമാകും. പതിനഞ്ച് പദ്ധതികൾ ട്രാക്കിലുണ്ടെന്നും അദ്ദേഹം പറഞ്ഞു.

37000 സ്ക്വയർ ഫീറ്റിലാണ് ദുബൈ മോട്ടോർ സിറ്റിയിലെ ലുലു ഹൈപ്പർമാർക്കറ്റ്. ദുബൈയിൽ 26ആമത്തേയും യുഎഇയിൽ 109ആമത്തേയും ഹൈപ്പർ മാർക്കറ്റാണിത്. ആഗോള ഉത്പന്നങ്ങൾ മികച്ച നിലവാരത്തിലാണ് ലുലു ഹൈപ്പർമാർക്കറ്റിൽ ഉറപ്പാക്കിയിരിക്കുന്നത്. ഗ്രോസറി, ഹോട്ട്ഫുഡ്, ബേക്കറി സെക്ഷനുകളും ഹെൽത്ത് ആൻഡ് ബ്യൂട്ടി, ഐടി ഇലക്ട്രോണിക്സ് ഹോംഅപ്ലെയ്ൻസ് ഉത്പന്നങ്ങളുടെ വിപുലമായ ശേഖരവും ഒരുക്കിയിട്ടുണ്ട്.

ജിസിസിയിലെ ലുലുവിന്റെ 265ആമത്തെ ഹൈപ്പർമാർക്കറ്റാണ് മോട്ടോർ സിറ്റിയിലേത്. ലുലു സിഇഒ സൈഫി രൂപാവാല, എക്സിക്യൂട്ടീവ് ഡയറക്ടർ അഷറഫ് അലി എം.എ, ഗ്ലോബൽ ഓപ്പറേഷൻസ് ഡയറക്ടർ സലിം എം.എ, സിഒഒ സലിം വി.ഐ തുടങ്ങിയവർ ഉദ്ഘാടനം ചടങ്ങിൽ ഭാഗമായി.

82000 റീട്ടെയ്ൽ സബ്സ്ക്രൈബേഴ്സും 25ഇരട്ടി അധികസമാഹരണവുമായി മൂന്ന് ലക്ഷം കോടിയിലധികം രൂപയാണ് ലുലു ഐപിഒ സമാഹരിച്ചത്. മികച്ച നിക്ഷേപക പങ്കാളിത്വത്തോടെ യുഎഇയിലെ തന്നെ ഈ വർഷത്തെ ഏറ്റവും വലിയ റീട്ടെയ്ൽ ഐപിഒ എന്ന റെക്കോർഡും ലുലു സ്വന്തമാക്കിയിരുന്നു. നവംബർ 14നാണ് അബുദബി സെക്യൂരീറ്റീസ് എക്സ്ചേഞ്ചിലെ ലിസ്റ്റിങ്ങ്.