നിലമ്പൂരില്‍ റബ്ബര്‍ ടാപ്പിംഗ് തൊഴിലാളിക്ക് വെട്ടേറ്റു; പോലീസ് കേസെടുത്തു

നിലമ്പൂര്‍| മലപ്പുറം നിലമ്പൂര്‍ മൂത്തേടത്ത് റബ്ബര്‍ ടാപ്പിംഗ് തൊഴിലാളിക്ക് വെട്ടേറ്റതായി പരാതി. കാരപ്പുറം സ്വദേശി നൗഫലിന്(40) നേരെയാണ് ആക്രമണമുണ്ടായത്. ഇന്ന് പുലര്‍ച്ചെ 4.30 ഓടെയാണ് നൗഫലിനെ വെട്ടിയത്. ബൈക്കില്‍ ടാപ്പിംഗിന് പോകുമ്പോഴാണ് സംഭവം.

ആക്രമണത്തില്‍ നൗഫലിന്റെ ചെവിക്ക് പിറകില്‍ പരിക്കേറ്റു. ഇയാളെ മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്. ആക്രമണത്തിന് പിന്നില്‍ ആരാണെന്ന് വ്യക്തമല്ലെന്നാണ് നൗഫല്‍ പോലീസിന് മൊഴി നല്‍കിയത്. സംഭവത്തില്‍ എടക്കര പോലീസ് കേസെടുത്ത് അന്വേഷണം ആരംഭിച്ചു.