കൊല്ലത്ത് പ്രണയാഭ്യര്‍ഥന നിരസിച്ച സ്‌കൂള്‍ വിദ്യാര്‍ത്ഥിനിയ്ക്ക് വധഭീഷണി; രണ്ട് പേര്‍ പിടിയില്‍

കൊല്ലം| കൊല്ലത്ത് പ്രണയാഭ്യര്‍ഥന നിരസിച്ച സ്‌കൂള്‍ വിദ്യാര്‍ഥിനിയെ കൊല്ലുമെന്ന് ഭീഷണിപ്പെടുത്തിയ കേസില്‍ രണ്ട് പേര്‍ പിടിയില്‍. കൊല്ലം കുളത്തൂപ്പുഴ സ്വദേശി ശ്രീജിത്ത്, സുഹൃത്ത് മഹേഷ് എന്നിവരാണ് പോലീസിന്റെ പിടിയിലായത്. പ്രതികള്‍ക്കെതിരെ പോക്‌സോ വകുപ്പുകള്‍ ചുമത്തി കേസെടുത്തു. പെണ്‍കുട്ടിയുമായി പരിചയം സ്ഥാപിച്ച ശ്രീജിത്ത് നിരന്തരം ശല്യപ്പെടുത്തിയിരുന്നു. പ്രണയാഭ്യര്‍ഥന നിരസിച്ചതിനെ പിന്നാലെയാണ് കുട്ടിക്ക് നേരെ ഭീഷണി ഉണ്ടായത്. മുന്‍പും പ്രതി ശ്രീജിത്ത് കുട്ടിയുടെ വീട്ടിലെത്തി ഭീഷണിപ്പെടുത്തിയിരുന്നു. കുടുംബം നല്‍കിയ പരാതിയില്‍ ശ്രീജിത്തിനെ വിളിച്ചുവരുത്തി താക്കീത് നല്‍കി വിട്ടിരുന്നു.

കഴിഞ്ഞ ദിവസം മാതാവിനൊപ്പമെത്തിയ കുട്ടിക്ക് നേരെ കുളത്തൂപ്പുഴ ടൗണില്‍ വച്ചാണ് അതിക്രമമുണ്ടായത്. ഓട്ടോ ഡ്രൈവറായ മഹേഷിനൊപ്പമെത്തിയ ശ്രീജിത്ത് പെണ്‍കുട്ടിയെ ആക്രമിക്കാന്‍ ശ്രമിക്കുകയും പെട്രോളൊഴിച്ച് കൊലപ്പെടുത്തുമെന്ന് ഭീഷണിപ്പെടുത്തുകയും ചെയ്തു. ബഹളം കേട്ട് എത്തിയ നാട്ടുകാര്‍ പോലീസിനെ വിവരമറിയിച്ചു. ഇരുവരെയും പോലീസ് കസ്റ്റഡിയിലെടുത്തു.

പ്രതികള്‍ സഞ്ചരിച്ചിരുന്ന ഓട്ടോറിക്ഷയില്‍ നിന്നും കുപ്പിയില്‍ നിറച്ച് സൂക്ഷിച്ചിരുന്ന പെട്രോള്‍ പോലീസ് കണ്ടെടുത്തു. തുടര്‍ന്ന് പെണ്‍കുട്ടിയുടെ മൊഴി രേഖപ്പെടുത്തിയ പോലീസ് പോക്‌സോ നിയമ പ്രകാരം പ്രതികള്‍ക്കെതിരെ കേസെടുത്തു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.