ഷാജ് കിരണിന് ബി ജെ പി നേതാവ് സന്ദീപ് വാര്യരുമായി അടുത്ത ബന്ധമെന്ന് റിപ്പോർട്ട്

പാലക്കാട് | സ്വര്‍ണക്കടത്ത് കേസ് പ്രതി സ്വപ്‌ന സുരേഷ് മുഖ്യമന്ത്രിയുടെ ഇടനിലക്കാരനെന്ന് ആരോപിച്ച ഷാജ് കിരണിന് ബി ജെ പി നേതാവുമായി അടുത്ത ബന്ധമെന്ന് റിപ്പോര്‍ട്ട്. ബി ജെ പി സംസ്ഥാന വക്താവും പാലക്കാട്ടെ പ്രധാന നേതാവുമായ സന്ദീപ് ജി വാര്യരുമായാണ് ഷാജിന് അടുത്ത ബന്ധമുള്ളത്. കര്‍ണാടക മന്ത്രി വി സുനില്‍കുമാറിന്റെ വിരുന്നില്‍ സന്ദീപും ഷാജും പങ്കെടുക്കുന്ന ചിത്രങ്ങള്‍ പുറത്തുവന്നിട്ടുണ്ട്.

മന്ത്രിയുടെ വസതിയില്‍ സംഘടിപ്പിച്ച വിരുന്നിലാണ് ഇരുവരും പങ്കെടുത്തത്. സന്ദീപിനെതിരെ ബി ജെ പിയില്‍ വ്യാപക പരാതികള്‍ ഉയര്‍ന്നിട്ടുണ്ട്. കന്നഡ മന്ത്രി സുനില്‍ കുമാറും സന്ദീപിനെതിരെ പരാതി നല്‍കിയതായാണ് റിപ്പോര്‍ട്ടുകള്‍.

ഇതിനെ തുടര്‍ന്ന്, സന്ദീപിന് ബി ജെ പി നിയന്ത്രണങ്ങള്‍ ഏര്‍പ്പെടുത്തിയതായാണ് റിപ്പോര്‍ട്ട്. മുഖ്യമന്ത്രി പിണറായി വിജയന്റെയും സി പി എം സംസ്ഥാന സെക്രട്ടറി കോടിയേരി ബാലകൃഷ്ണൻ്റെയും ഇടനിലക്കാരനാണ് ഷാജ് കിരണെന്നും പരസ്യ ആരോപണങ്ങള്‍ക്ക് ശേഷം തന്നെ ഭീഷണിപ്പെടുത്തിയതായും സ്വപ്‌ന ആരോപിച്ചിരുന്നു. താന്‍ മുന്‍ മാധ്യമ പ്രവര്‍ത്തകനും റിയല്‍ എസ്റ്റേറ്റ് ഇടനിലക്കാരനുമാണെന്നാണ് ഷാജ് കിരണ്‍ പറയുന്നത്. അതിനിടെ ഈ വിഷയത്തിൽ രൂക്ഷ പ്രതികരണവുമായി സന്ദീപ് രംഗത്തെത്തി. കർണാടക മന്ത്രിയെന്നതിലുപരി കേരളത്തിന്റെ സഹപ്രഭാരി ആയിരുന്ന സുനിൽ കുമാർജിയുടെ വീട്ടിലെ ആയിരത്തിലധികം പേര് പങ്കെടുത്ത ചടങ്ങിൽ കൊല്ലത്തുള്ള മന്ത്രിയുടെ സുഹൃത്ത് രജിത്ത് വിളിച്ചപ്പോൾ കഴിഞ്ഞ വർഷം യാദൃഛികമായി പോയതാണെന്നും രജിത്തിന്റെ കൂടെയാണ് ഷാജ്‌ കിരൺ എന്ന മാധ്യമ പ്രവർത്തകൻ എന്ന് സ്വയം പരിചയപ്പെടുത്തിയ അവതാരത്തെ കാണുന്നതെന്നും മന്ത്രി ഭക്ഷണം കഴിക്കുന്നവരുടെ ടേബിളിന് അടുത്തു കൂടെ വന്ന് രണ്ടു മിനുട്ട് സംസാരിച്ച് ഫോട്ടോയെടുത്തുവെന്നും സന്ദീപ് ഫേസ്ബുക്കിൽ കുറിച്ചു. പോസ്റ്റ് പൂർണരൂപത്തിൽ