ഷാർജ ആഫ്രിക്കൻ സാഹിത്യോത്സവം ആരംഭിച്ചു

ഷാർജ| ഷാർജ ഫെസ്റ്റിവൽ ഓഫ് ആഫ്രിക്കൻ ലിറ്ററേച്ചറിന് തുടക്കമായി. യൂണിവേഴ്സിറ്റി സിറ്റി ഹാളിന് സമീപമുള്ള തുറസ്സായ സ്ഥലത്താണ് പരിപാടി. ഷാർജ ബുക്ക് അതോറിറ്റി സംഘടിപ്പിക്കുന്ന ഫെസ്റ്റിവലിൽ എട്ട് പുസ്തക ചർച്ചകളിലും മൂന്ന് സെമിനാറുകളിലുമായി നോബൽ സമ്മാന ജേതാക്കളായ അബ്ദുർറസാഖ് ഗുർനയും വോലെ സോയിങ്കയും ഉൾപ്പെടെ 29 എഴുത്തുകാർ ഒത്തുചേരും. ആഗോള സംസ്‌കാരത്തിന് ആഫ്രിക്കൻ സാഹിത്യത്തിന്റെയും കലയുടെയും സംഭാവനകളിലേക്ക് വെളിച്ചം വീശുന്ന സെഷനുകളും നടക്കും.

പരമ്പരാഗത ആഫ്രിക്കൻ നൃത്ത പരിപാടികൾ, ആഫ്രിക്കൻ നാടോടിക്കഥകൾ, ആർട്ട് എക്‌സിബിഷനുകൾ, ആഫ്രിക്കയുടെ പാചക രഹസ്യങ്ങളിലേക്ക് ഒരു നേർക്കാഴ്ച നൽകുന്ന പാചക ശിൽപശാലകൾ എന്നിവയും ഉണ്ടാവും.

ആഫ്രിക്കൻ സാഹിത്യോത്സവത്തിൽ പങ്കെടുക്കാൻ പ്രമുഖരെത്തി. ഷാർജ ലൈഫ് ടൈം അച്ചീവ്‌മെന്റ്ഇൻ ലിറ്ററേച്ചർ അവാർഡ് നൽകി നൈജീരിയൻ നോബൽ സമ്മാന ജേതാവായ വോൾ സോയിങ്കയെ എസ് ബി എ ചെയർപേഴ്സൺ ശൈഖ ബുദൂർ ബിൻത് സുൽത്താൻ അൽ ഖാസിമി ആദരിച്ചു. യു എ ഇയിൽ നിന്നും ആഫ്രിക്കയിൽ നിന്നുമുള്ള 29 സാഹിത്യ പ്രതിഭകളെ ഷാർജയിൽ സ്വീകരിച്ചു. സാംസ്‌കാരിക വിനിമയത്തിന്റെ മൂല്യങ്ങൾ ഈ ഉത്സവം ഉയർത്തിക്കാട്ടുകയും സാഹിത്യത്തിന്റെയും കലയുടെയും ആഗോള ദീപസ്തംഭം എന്ന നിലയിൽ ഷാർജയുടെ അഭിമാനകരമായ പദവിയെ പ്രതിഫലിപ്പിക്കുകയും ചെയ്യുമെന്നു ശൈഖ ബുദൂർ പറഞ്ഞു.

വോൾ സോയിങ്ക, അബ്ദുൾറസാഖ് ഗുർണ എന്നിവർ മൂന്ന് പുസ്തക ചർച്ചകൾക്കും എട്ട് സെമിനാറുകൾക്കും നേതൃത്വം നൽകും. ആഫ്രിക്കൻ കരകൗശല വസ്തുക്കൾ, മൺപാത്ര നിർമാണം, ആഭരണ രൂപകൽപ്പന എന്നിവയുൾപ്പെടെ 12 ശിൽപ്പശാലകൾ നടക്കും. നാല് ദിവസത്തെ പരിപാടിയിലുടനീളം പ്രമുഖർ അണിനിരക്കും. ഷാർജ ഭരണാധികാരി ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ രക്ഷാകർതൃത്വത്തിലാണ് പരിപാടി. എസ്ബിഎ സിഇഒ അഹമ്മദ് അൽ ആമിരി ഉദ്ഘാടന ചടങ്ങിൽ പങ്കെടുത്തു. 1986 ൽ സാഹിത്യത്തിനുള്ള നോബൽ സമ്മാനം നേടിയ ആദ്യ ആഫ്രിക്കക്കാരനാണ് സോയിങ്ക.