ശൈഖ് ഖാലിദും ഡോ. ജയശങ്കറും കൂടിക്കാഴ്ച നടത്തി

അബൂദബി| ഇന്ത്യൻ വിദേശകാര്യ മന്ത്രി ഡോ. സുബ്രഹ്‌മണ്യം ജയശങ്കറും അബൂദബി കിരീടാവകാശി ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്്യാനും കൂടിക്കാഴ്ച നടത്തി. റിപ്പബ്ലിക് ദിന ചടങ്ങുകളിൽ സംബന്ധിക്കാനായിരുന്നു ഡോ. ജയശങ്കർ തലസ്ഥാനത്തെത്തിയത്. അബൂദബിയിൽ നടന്ന കൂടിക്കാഴ്ചയിൽ അന്താരാഷ്ട്ര സഹകരണ സഹമന്ത്രി റീം അൽ ഹാശിമിയും സന്നിഹിതരായിരുന്നു.

യു എ ഇ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് അബ്ദുല്ല ബിൻ സായിദ് അൽ നഹ്്യാനുമായും ജയശങ്കർ കൂടിക്കാഴ്ച നടത്തി. കൂടിക്കാഴ്ചയിൽ സാമ്പത്തിക, വാണിജ്യ, നിക്ഷേപ, സാംസ്‌കാരിക മേഖലകളിൽ സഹകരണം ശക്തിപ്പെടുത്തുന്നതിനുള്ള വഴികൾ പര്യവേക്ഷണം ചെയ്തു.  പ്രാദേശികവും അന്തർദേശീയവുമായ സംഭവവികാസങ്ങളെ കുറിച്ച് അഭിപ്രായങ്ങൾ കൈമാറുകയും ചെയ്തു.