പഞ്ചാബില്‍ ശിവസേന നേതാവിനെ വെടിവെച്ചു കൊന്നു

ചണ്ഡീഗഢ്|പഞ്ചാബിലെ മോഗയില്‍ ശിവസേന നേതാവിനെ വെടിവെച്ചു കൊന്നു.
ബൈക്കില്‍ പിന്തുടര്‍ന്ന് വെടിവെച്ചു കൊന്നു. ജില്ലാ പ്രസിഡന്റ് മംഗത് റായിയാണ് കൊല്ലപ്പെട്ടത്. അക്രമികള്‍ ഇന്നലെ രാത്രി 10 മണിയോടെ സ്റ്റേഡിയം റോഡില്‍ വെച്ച് ബൈക്കില്‍ പിന്തുടര്‍ന്ന് മംഗതിനുനേരെ വെടിയുതിര്‍ക്കുകയായിരുന്നു. സംഭവത്തില്‍ 11 വയസ്സുള്ള ആണ്‍കുട്ടിക്ക് പരുക്കേറ്റിട്ടുണ്ട്.

മംഗത് ഇരുചക്രവാഹനത്തില്‍ കയറി രക്ഷപ്പെടാനായി ശ്രമിച്ചെങ്കിലും അക്രമികള്‍ പിന്തുടര്‍ന്ന് വീണ്ടും വെടിയുതിര്‍ക്കുകയായിരുന്നുവെന്ന് പിടിഐ റിപ്പോര്‍ട്ട് ചെയ്തു. പോലീസ് എത്തി മംഗത് റായിയെ ആശുപത്രിയിലേക്ക് കൊണ്ടുപോയെങ്കിലും രക്ഷിക്കാനായില്ല. പരുക്കേറ്റ കുട്ടിയെ ആദ്യം മോഗ സിവില്‍ ആശുപത്രിയില്‍ പ്രവേശിപ്പിച്ചു. പിന്നീട് മറ്റൊരു ആശുപത്രിയിലേക്ക് മാറ്റിയതായാണ് വിവരം.