സുന്നികളെ വിമർശിക്കാനുള്ള തിടുക്കത്തിൽ ചേക്കുട്ടിമാരെ ഇങ്ങനെ വെളുപ്പിക്കണോ?

ജമാഅത് സഹയാത്രികരായ റമീസ് മുഹമ്മദും അഷ്‌കറും ചേർന്ന് വാരിയൻകുന്നന്റെ ഫോട്ടോ കണ്ടെത്തിയത് എ പി സുന്നികൾക്ക് തീരെ ഇഷ്ടമായില്ല, അതുകൊണ്ടാണ് പുസ്തകം പുറത്തിറങ്ങിയതിനു പിറകെ ഉണ്ടായ വിമർശങ്ങൾ എന്നാണ് ‘ഉമ്മത്തീ മുസ്ലിംകൾ’ ഒടുവിൽ എത്തിച്ചേർന്നിരിക്കുന്ന തീർപ്പ്. പുസ്തകപ്രകാശനത്തിന് പിറകെ, ആ ഫോട്ടോ ആഘോഷിക്കപ്പെടേണ്ടതില്ല എന്ന് സൂചിപ്പിച്ചുകൊണ്ട് ഫേസ്ബുക്കിൽ പോസ്റ്റിടാൻ തോന്നിയ ആ നിമിഷത്തെയോർത്ത് ഒരു ‘എ പി സുന്നിക്കാരൻ’ എന്ന നിലയിൽ ഞാനിപ്പോൾ കൂടുതലായി അഭിമാനിക്കുന്നു. പൊളിറ്റിക്കൽ ഇസ്ലാമിന്റെ വാരിയംകുന്നൻ മോഹങ്ങളെ പരാമർശിച്ചുകൊണ്ട് മറ്റൊരു പോസ്റ്റ്‌ കൂടി ഇതേ ഇടത്തിൽ ഇട്ടിരുന്നു. ഇനിയൊരിക്കൽ കൂടി ആ വിഷയത്തിൽ ഒരു പോസ്റ്റ്‌ വേണ്ടെന്ന് വെച്ചതാണ്. പക്ഷേ ഡോ.അബ്ബാസ് പനക്കലിന്റെ വെളിപ്പെടുത്തലിനോട്‌ അതിന്റെ ചരിത്രപരതയിൽ നിന്നുകൊണ്ട് സംവദിച്ച സുന്നി പ്രൊഫൈലുകളോട് സമൂഹമാധ്യമങ്ങളിലെ ‘ഉമ്മത്തീ മുസ്ലിംകളുടെ’ അസഹിഷ്ണുത കണ്ടപ്പോൾ ചിലത് പറയാതെ വയ്യെന്നായിരിക്കുന്നു. രണ്ടു വാദങ്ങളാണ് ഉമ്മത്തീ മുസ്ലിംകളുടേതായി എന്റെ ശ്രദ്ധയിൽ പെട്ടത്.

വാദം 1. റമീസിന്റെ നീണ്ടകാലത്തെ ഗവേഷണത്തിന്റെ ഫലശ്രുതി ആണ് ആ ഫോട്ടോയും പുസ്തകവും. അതുകൊണ്ട് അതിനെ വിമർശിക്കുന്നത് ശരിയല്ല.

-റമീസ് മുഹമ്മദിന്റെ അധ്വാനത്തെയോ ഗവേഷണത്തെയോ ആരും വില കുറച്ചു കണ്ടിട്ടില്ല. ആ പുസ്തകം വായിക്കരുത് എന്ന് പ്രസ്താവിച്ചിട്ടുമില്ല. അതേസമയം ഒരു പതിറ്റാണ്ട് കാലമോ അതിലധികമോ വർഷങ്ങൾ ഒരു ഗവേഷണത്തിനു വേണ്ടി ചെലവിട്ടു എന്നത് കൊണ്ട് ഒരാളുടെ എല്ലാ നിരീക്ഷണങ്ങളും നിഗമനങ്ങളും മറുവാക്കില്ലാതെ അംഗീകരിച്ചുകൊടുക്കണം എന്ന നിലപാട് ഗവേഷണത്തിന്റെ മൗലിക താല്പര്യങ്ങളെത്തന്നെയാണ് റദ്ദ് ചെയ്യുന്നത്. സംവദിച്ചും തിരുത്തിയും പുനരാലോചിച്ചുമൊക്കെ തന്നെയാണ് ഗവേഷണങ്ങൾ സംഭവിക്കുന്നത്.