സജീവ രാഷ്ട്രീയത്തില്‍ നിന്ന് വിരമിക്കുമെന്ന സൂചന നല്‍കി സോണിയ ഗാന്ധി

റായ്പൂര്‍| കോണ്‍ഗ്രസിന്റെ വളര്‍ച്ചയിലെ നിര്‍ണായക വഴിത്തിരിവാണ് ഭാരത് ജോഡോ യാത്രയെന്ന് മുന്‍ അധ്യക്ഷ സോണിയ ഗാന്ധി. തന്റെ ഇന്നിങ്‌സ് ഈ യാത്രയോടെ അവസാനിച്ചേക്കുമെന്നും ഛത്തിസ്ഗഡിലെ റായ്പുരില്‍ കോണ്‍ഗ്രസ് പ്ലീനറി സമ്മേളനത്തെ അഭിസംബോധന ചെയ്ത് അവർ പറഞ്ഞു. സജീവ രാഷ്ട്രീയത്തില്‍ നിന്ന് വിരമിക്കുന്നെന്ന സൂചനയാണ് ഇതിലൂടെ സോണിയ ഗാന്ധി നല്‍കിയത്.

2004ലെയും 2009ലെയും വിജയങ്ങളും ഡോ. ​​മൻമോഹൻ സിങ്ങിന്റെ സമർത്ഥമായ നേതൃത്വവും എനിക്ക് വ്യക്തിപരമായ സംതൃപ്തി നൽകി. എന്നാൽ എന്നെ ഏറ്റവും ആഹ്ളാദിപ്പിക്കുന്ന കാര്യം, കോൺഗ്രസിന്റെ ചരിത്രത്തിലെ വഴിത്തിരിവായ ഭാരത് ജോഡോ യാത്രയോടെ എന്റെ ഇന്നിംഗ്‌സ് അവസാനിക്കുമെന്നതാണ് – സോണിയ പറഞ്ഞു.

കോൺഗ്രസിനും രാജ്യത്തിനും ഇത് വെല്ലുവിളി നിറഞ്ഞ സമയമാണെന്നും സോണിയ പറഞ്ഞു. ബിജെപി-ആർഎസ്എസ് കൂട്ടുകെട്ട് രാജ്യത്തെ എല്ലാ സ്ഥാപനങ്ങളും പിടിച്ചടക്കുകയും അട്ടിമറിക്കുകയും ചെയ്തു. ഏതാനും വ്യവസായികൾക്ക് വേണ്ടി തീരുമാനങ്ങൾ എടുത്തത് സാമ്പത്തിക തകർച്ചയ്ക്ക് കാരണമായെന്നും സോണിയ ചൂണ്ടിക്കാട്ടി.