സാബു എം ജേക്കബിനെ പരിഹസിച്ച് ശ്രീനിജൻ എം എൽ എ

തിരുവനന്തപുരം | കിറ്റക്സ് ഉടമ സാബു എം ജേക്കബിനെ പരിഹസിച്ച് കുന്നത്തുനാട് എം എൽ എ അഡ്വ. പി വി ശ്രീനിജൻ. ശ്രീനിജൻ തന്നോട് മാപ്പ് പറയണമെന്നും അതിന് ശേഷം തൃക്കാക്കര ഉപതിരഞ്ഞെടുപ്പിൽ പിന്തുണക്കുന്ന കാര്യം ആലോചിക്കാമെന്നും സാബു എം ജേക്കബ് പറഞ്ഞതിനോടുള്ള പ്രതികരണമായി ഫേസ്ബുക്കിലായിരുന്നു എം എൽ എയുടെ പരിഹാസം. ആരുടെ കൈയിലെങ്കിലും കുന്ദംകുളം മാപ്പ് ഉണ്ടെങ്കിൽ തരണേ, ഒരാൾക്ക് കൊടുക്കാനാണ് എന്നായിരുന്നു ശ്രീനിജൻ്റെ പ്രതികരണം.

വർഷങ്ങൾക്ക് മുമ്പ് തന്നോട് മാപ്പ് പറയണമെന്ന കോഴിക്കോട് എം പി. എം കെ രാഘവൻ്റെ ആവശ്യത്തോട് കലക്ടർ ബ്രോ എന്നറിയപ്പെട്ട കോഴിക്കോട് കലക്ടർ പ്രശാന്ത് നായർ ഫേസ്ബുക്കിൽ കുന്ദംകുളത്തിൻ്റെ മാപ്പ് പോസ്റ്റ് ചെയ്ത് പരിഹസിച്ചത് ഏറെ വിവാദമായിരുന്നു. ഇതിന് ശേഷം പലപ്പോഴും മാപ്പ് ആവശ്യത്തോട് കുന്ദംകുളത്തിൻ്റെ മാപ്പിട്ട് പരിഹസിക്കുന്നത് ഒരു രീതിയായി സോഷ്യൽ മീഡിയയിൽ മാറി.