എസ് എസ് എഫ് കേരള സാഹിത്യോത്സവ്; മത്സര വേദികള്‍ നാളെ ഉണരും

മഞ്ചേരി | 31ാമത് എസ് എസ് എഫ് കേരള സാഹിത്യോത്സവിലെ മത്സരങ്ങള്‍ക്ക് നാളെ (ശനി) തുടക്കമാകും. മഞ്ചേരി നഗരത്തിന്റെ വിവിധ ഭാഗങ്ങളിലായി ഒരുക്കിയ 13 വേദികളിലായാണ് മത്സരങ്ങള്‍ നടക്കുന്നത്. ‘ജീവിതം’ എന്ന പ്രമേയത്തിലാണ് ഇത്തവണ സാഹിത്യോത്സവ് സംഘടിപ്പിക്കുന്നത്.

സംസ്ഥാനത്തെ 14 ജില്ലകളിലെയും നീലഗിരിയിലെയും 1,946 മത്സരാര്‍ഥികള്‍ 170 കലാ-സാംസ്‌കാരിക മത്സരങ്ങളില്‍ മാറ്റുരയ്ക്കും. കേന്ദ്ര സാഹിത്യ അക്കാദമി അവാര്‍ഡ് ജേതാവും ഹിന്ദി-മറാഠി ഭാഷകളിലെ പ്രമുഖ എഴുത്തുകാരനുമായ വിശ്വാസ് പാട്ടീല്‍ സാഹിത്യോത്സവ് ഉദ്ഘാടനം ചെയ്യും. മത്സരങ്ങള്‍ക്ക് മറ്റന്നാള്‍ (ഞായര്‍) വൈകിട്ട് തിരശ്ശീല വീഴും.

നാളെ വൈകിട്ട് നാലിന് നടക്കുന്ന ഉദ്ഘാടന സംഗമത്തില്‍ എസ് എസ് എഫ് സംസ്ഥാന പ്രസിഡന്റ് ഫിര്‍ദൗസ് സുറൈജി സഖാഫി അധ്യക്ഷത വഹിക്കും. സമസ്ത കേന്ദ്ര മുശാവറ അംഗം മഞ്ഞപ്പറ്റ ഹംസ മുസ്‌ലിയാര്‍, കെ പി രാമനുണ്ണി, ഡോ. എ പി അബ്ദുല്‍ ഹകീം അസ്ഹരി, മജീദ് കക്കാട്, മുസ്തഫ കോഡൂര്‍, സയ്യിദ് മുനീറുല്‍ അഹ്ദല്‍ അഹ്‌സനി പ്രസംഗിക്കും.

ഇന്ന് നടന്ന ‘നമ്മുടെ ആഖ്യാനങ്ങളില്‍ ജീവിതം തെളിയുന്നുണ്ടോ’ സെഷനില്‍ ടി ഡി രാമകൃഷ്ണന്‍ പ്രഭാഷണം നടത്തി. വിദ്യാര്‍ഥികളുടെ കലാ-സാംസ്‌കാരിക മത്സരങ്ങള്‍ക്കു പുറമെ വിവിധ ചര്‍ച്ചാ സംഗമങ്ങളും പ്രഭാഷണങ്ങളും നടക്കുന്നുണ്ട്. നാളെ നടക്കുന്ന വിവിധ സെഷനുകളില്‍ പി സുരേന്ദ്രന്‍, വീരാന്‍കുട്ടി, എസ് ജോസഫ്, കെ പി രാമനുണ്ണി, ഡോ. കെ എം അനില്‍ പ്രസംഗിക്കും. വ്യത്യസ്ത പ്രസാധകര്‍ പങ്കെടുക്കുന്ന ‘പുസ്തകലോകം’ പുസ്തക മേള മന്ത്രി വി അബ്ദുറഹ്മാന്‍ ഉദ്ഘാടനം ചെയ്യും.

സാഹിത്യോത്സവിന്റെ ഭാഗമായി ഉപരി പഠന മാര്‍ഗനിര്‍ദേശങ്ങള്‍ നല്‍കാന്‍ വേണ്ടി എജ്യൂസൈന്‍ പവലിയനും വിവിധ കാമ്പസുകളില്‍ നിന്ന് തിരഞ്ഞെടുക്കപ്പെട്ട 200 വിദ്യാര്‍ഥികള്‍ക്ക് സാഹിത്യ പരിശീലന ക്യാമ്പും സംവിധാനിച്ചിട്ടുണ്ട്. മറ്റന്നാള്‍ വൈകിട്ട് നാലിന് നടക്കുന്ന സമാപന സംഗമം ഇന്ത്യന്‍ ഗ്രാന്‍ഡ് മുഫ്തി കാന്തപുരം എ പി അബൂബക്കര്‍ മുസ്‌ലിയാര്‍ ഉദ്ഘാടനം ചെയ്യും. സമസ്ത പ്രസിഡന്റ് ഇ സുലൈമാന്‍ മുസ്‌ലിയാര്‍ അധ്യക്ഷത വഹിക്കും. സയ്യിദ് ഇബ്‌റാഹീം ഖലീലുല്‍ ബുഖാരി, വണ്ടൂര്‍ അബ്ദുറഹ്മാന്‍ ഫൈസി, സി പി ഉബൈദുല്ല സഖാഫി, ഫിര്‍ദൗസ് സുറൈജി സഖാഫി പങ്കെടുക്കും.

സാഹിത്യോത്സവ് അവാര്‍ഡ് പി എന്‍ ഗോപീകൃഷ്ണന് സമ്മാനിച്ചു
സാഹിത്യോത്സവ് അവാര്‍ഡ് കവിയും എഴുത്തുകാരനുമായ പി എന്‍ ഗോപീകൃഷ്ണന് സമ്മാനിച്ചു. സമസ്ത കേരള ജംഇയ്യത്തുല്‍ ഉലമ സെക്രട്ടറി പൊന്മള അബ്ദുല്‍ ഖാദിര്‍ മുസ്‌ലിയാരാണ് പുരസ്‌കാരം സമ്മാനിച്ചത്. 50,001 രൂപയും പ്രത്യേകം രൂപകല്‍പ്പന ചെയ്ത ശിലാഫലകവും അടങ്ങുന്നതാണ് അവാര്‍ഡ്.

അവാര്‍ഡ് ദാന ചടങ്ങില്‍ വെങ്കിടേഷ് രാമകൃഷ്ണന്‍, രാജീവ് ശങ്കരന്‍, സി എന്‍ ജാഫര്‍ സ്വാദിഖ്, ഫിര്‍ദൗസ് സുറൈജി സഖാഫി, സി ആര്‍ കെ മുഹമ്മദ് പ്രസംഗിച്ചു. സയ്യിദ് സ്വലാഹുദ്ധീന്‍ ബുഖാരി, മുസ്തഫ കോഡൂര്‍, ജാബിര്‍ നെരോത്ത്, ഡോ അബൂബക്കര്‍ സംബന്ധിച്ചു.

ശശി തരൂര്‍, കെ സച്ചിദാനന്ദന്‍, എന്‍ എസ് മാധവന്‍, തോപ്പില്‍ മുഹമ്മദ് മീരാന്‍, കെ പി രാമനുണ്ണി, പി സുരേന്ദ്രന്‍ തുടങ്ങിയവര്‍ക്കാണ് മുന്‍ വര്‍ഷങ്ങളില്‍ പുരസ്‌കാരം നല്‍കിയത്.