യുകെയിൽ പഠിക്കണോ? ഷെവനിംഗ് സ്‌കോളർഷിപ്പിന്‌ അപേക്ഷിക്കാം

ബ്രിട്ടീഷ് ഫോറിൻ ആൻഡ് കോമൺവെൽത്ത് ഓഫീസും പങ്കാളി സംഘടനകളും ധനസഹായം നൽകുന്ന ഒരു അന്താരാഷ്ട്ര സ്‌കോളർഷിപ്പാണ് ഷെവനിംഗ് സ്‌കോളർഷിപ്പ്. യുണൈറ്റഡ് കിംഗ്ഡത്തിലെ സർവകലാശാലകളിൽ പഠിക്കാൻ വിദേശ വിദ്യാർത്ഥികൾക്ക്‌ അവസരം ഒരുക്കാനാണ്‌ ഈ സ്‌കോളർഷിപ്പ്‌ ഏർപ്പെടുത്തിയിരിക്കുന്നത്‌. 1983ലാണ്‌ യുകെ സർക്കാർ ആഗോള സ്കോളർഷിപ്പ് പ്രോഗ്രാമായി ഷെവനിംഗ് സ്കോളർഷിപ്പ് ആരംഭിക്കുന്നത്‌.

കെൻ്റിലെ സെവെനോക്‌സിലെ ഷെവനിംഗ് ഹൗസിൽ നിന്നാണ് ഈ പേര്‌ ലഭിച്ചത്‌. വിദേശ, കോമൺവെൽത്ത്, ഡെവലപ്‌മെൻ്റ് ഓഫീസിനെ പ്രതിനിധീകരിച്ച് ഷെവനിംഗ് സെക്രട്ടേറിയറ്റാണ്‌ സ്‌കോളർഷിപ്പ്‌ നൽകുന്നത്‌. ഇന്ന് യുഎസ്എയും യൂറോപ്യൻ യൂണിയൻ്റെ ഭൂരിഭാഗവും ഒഴികെ, 160-ലധികം രാജ്യങ്ങളിലെ 1,500-ലധികം പേർക്ക്‌ ഈ ഷെവനിംഗ് സ്‌കോളർഷിപ്പ് നൽകുന്നു. അതത്‌ രാജ്യത്തെ വളർച്ചയ്‌ക്ക്‌ നേതൃത്വം നൽകാൻ കഴിയുന്ന വ്യക്തിപരവും ബൗദ്ധികവുമായ ഗുണങ്ങളുള്ള ബിരുദധാരികളെ സൃഷ്‌ടിക്കുകയാണ്‌ സ്‌കോളർഷിപ്പിന്‍റെ ലക്ഷ്യം.

ഷെവനിങ്‌ സ്കോളർഷിപ്പുകൾ യുകെയിലെ ബിരുദാനന്തര ബിരുദങ്ങൾക്കാണ്‌ അനുവദിക്കുന്നത്‌. വിദ്യാഭ്യാസ ചെലവ്‌ പൂർണമായും വഹിക്കുന്ന സ്‌കോളർഷിപ്പാണിത്‌. ഇന്ത്യയിൽനിന്നുള്ള വിദ്യാർഥികൾക്കും ഇതിന്‌ അപേക്ഷിക്കാം. സ്കോളർഷിപ്പിൽ ട്യൂഷൻ ഫീസ്, ജീവിതച്ചെലവ്, യാത്രാച്ചെലവ്‌ എന്നിവ ഉൾക്കൊള്ളുന്നു. ശക്തമായ അക്കാദമിക് റെക്കോർഡുകളും നേതൃത്വ ഗുണവുമുള്ള വ്യക്തികൾക്കാണ്‌ സ്കോളർഷിപ്പ് അനുവദിക്കുന്നത്‌.

സന്നദ്ധപ്രവർത്തനം, നെറ്റ്‌വർക്കിംഗ്, ഇൻ്റേൺഷിപ്പുകൾ എന്നിവ കേന്ദ്രീകരിച്ചുള്ള കോഴ്‌സുകൾക്ക്‌ പ്രത്യേക അവസരങ്ങൾ ഇതിൽ ഉൾപ്പെടുന്നു. സ്കോളർഷിപ്പിൻ്റെ 2025-26 സെഷനിലേക്കുള്ള അപേക്ഷയുടെ അവസാന തീയതി നവംബർ അഞ്ചാണ്‌. സ്കോളർഷിപ്പിന് രണ്ട് വർഷത്തെ പ്രവൃത്തിപരിചയം ആവശ്യമാണ്. അപേക്ഷകർ സർക്കാർ ധനസഹായത്തോടെ യുകെയിൽ മുമ്പ് പഠിച്ചിരിക്കരുത്. സ്കോളർഷിപ്പിൽ മുഴുവൻ സമയ, പാർട്ട് ടൈം, സന്നദ്ധപ്രവർത്തനം അല്ലെങ്കിൽ ഇൻ്റേൺഷിപ്പ് എന്നിവ ഉൾപ്പെടാം.

വിദ്യാഭ്യാസ സർട്ടിഫിക്കറ്റുകൾ, റഫറൻസുകൾ, യുകെ യൂണിവേഴ്സിറ്റി ഓഫർ എന്നിവ സ്‌കോളർഷിപ്പിനായുള്ള അപേക്ഷയിൽ ഉൾപ്പെടുത്തണം.