ബഹിരാകാശത്ത് ചീര നട്ട് സുനിത വില്യംസ്

എട്ട് മാസമായി നാസയുടെ ബഹിരാകാശ ദൗത്യത്തിലേര്‍പ്പെട്ടുവരുന്ന ഇന്ത്യൻ വംശജ കൂടിയായ ബഹിരാകാശ സഞ്ചാരി സുനിത വില്യംസ്, അന്താരാഷ്‌ട്ര ബഹിരാകാശ നിലയത്തിൽ താമസിച്ചുകൊണ്ട്, പുതിയ ഗവേഷണങ്ങളില്‍ ഏർപ്പെട്ടിരിക്കുകയാണെന്ന വാര്‍ത്തകള്‍ പുറത്തുവരുന്നു. ഭൂമിയെ അപേക്ഷിച്ച് ഗുരുത്വാകർഷണം കുറഞ്ഞ ബഹിരാകാശ പ്രതലത്തില്‍ ചീരത്തൈകള്‍ നട്ടുകൊണ്ടാണ് സുനിതയുടെ പുതിയ ഗവേഷണം. വ്യത്യസ്ത അളവിലുള്ള ജലം ചെടികളുടെ വളർച്ചയെ എങ്ങനെ സ്വാധീനിക്കുന്നുവെന്നറിയാനുള്ള പരീക്ഷണം കൂടിയാണിത്. നിലയത്തിലെ ഡിസ്ട്രിബ്യൂഷൻ റിസർവോയറിൽ നിന്നാണ് അവൾ ഇതിനായുള്ള വെള്ളത്തിൻ്റെ സാമ്പിളുകൾ ശേഖരിച്ചത്.

ഭൂമിയിലും ബഹിരാകാശത്തിലും വ്യത്യസ്ത അളവുകളിലുള്ള ജലം‌ എങ്ങനെ കൃഷിയില്‍ സ്വാധീനം ചെലുത്തുന്നുവെന്ന പഠനം കൂടി ഇതിലൂടെ നാസ ലക്ഷ്യമിടുന്നു. ഭാവിയിലെ ബഹിരാകാശ ദൗത്യങ്ങള്‍ക്കും ഉദ്ദേശിച്ചുള്ളതാണ് ഈ പരീക്ഷണം. സുനിതയുടെ സഹസഞ്ചാരിയായ ഹേഗും‌ ഈ ദൗത്യത്തില്‍ അവരുടെ സഹായത്തിനുണ്ട്.

ബഹിരാകാശത്തെ സസ്യവളർച്ചയെക്കുറിച്ച് സുസ്ഥിരമായ അറിവ് നേടാനുള്ള നാസയുടെ വിപുലമായ ശ്രമങ്ങളുടെ ഭാഗമാണ് ഈ ഗവേഷണം, മനുഷ്യന്‍റെ ബഹിരാകാശ യാത്രയുടെ ആദ്യനാളുകൾ മുതൽ ആരംഭിച്ചതാണിത്. ഈ ചീരക്കൃഷി പരീക്ഷണത്തിൽ നിന്നുള്ള കണ്ടെത്തലുകൾ ബഹിരാകാശ ആവാസ വ്യവസ്ഥകളിൽ സുസ്ഥിരമായ ഭക്ഷ്യ ഉൽപാദനത്തിന് കാര്യമായ പ്രത്യാഘാതങ്ങൾ ഉണ്ടാക്കും, ഇതിലൂടെ ഭാവിയിലെ വിപുലമായ ബഹിരാകാശ ദൗത്യങ്ങളിൽ ഭക്ഷ്യ വിതരണവുമായി ബന്ധപ്പെട്ട വെല്ലുവിളികളെ മറികടക്കാനുള്ള വഴി തെളിയുമെന്നാണ് നാസയുടെ കണക്കുകൂട്ടല്‍.

അതോടൊപ്പം സുനിത വില്യംസ് തൻ്റെ സഹ ബഹിരാകാശയാത്രികനായ ഹേഗിൻ്റെ വാസ്കുലർ ആരോഗ്യം നിരീക്ഷിക്കുന്നതിനുള്ള അൾട്രാസൗണ്ട് സ്കാൻ ഉൾപ്പെടെയുള്ള മെഡിക്കൽ പരിശോധനകളിലും പങ്കാളിയാണ്. ദീര്‍ഘകാലത്തെ ബഹിരാകാശ യജ്ഞങ്ങള്‍ മനുഷ്യന്റെ ആരോഗ്യത്തില്‍ ചെലുത്തുന്ന മാറ്റങ്ങള്‍ നിരീക്ഷിക്കാനാണിത്.

ഈ പരീക്ഷണങ്ങളെക്കുറിച്ചുള്ള വാര്‍ത്തകള്‍ വരുമ്പോഴും ഇവരെ തിരിച്ചുകൊണ്ടുവരാനുള്ള ശ്രമങ്ങള്‍ തുടരുകയാണെന്ന് നാസ അറിയിക്കുന്നു.